काठमाडौं । नेपाल वायुसेवा निगम संरचनागत सुधार अध्ययन समितिको प्रतिवेदन अध्ययन तथा कार्यान्वयन गर्न बनेको समितिले चौथो प्रतिवेदन बुझाएको छ ।

संस्कृति पर्यटन तथा नागरिक उड्डयन मन्त्रालयले पूर्वगर्भनर दीपेन्द्रबहादुर क्षेत्री नेतृत्वमा समिति बनाएको थियो । सो प्रतिवेदन कार्यान्वयन गर्न पूर्वक्याप्टेन कुलबहादुर लिम्बू नेतृत्वमा समिति बनेको थियो । सो समितिले बिहीबार चौथो प्रतिवेदन बुझाएको हो । 

समितिले संस्कृति पर्यटन तथा नागरिक उड्डयनमन्त्री सुदन किराती, मन्त्रालयका सचिव दिपक काफ्ले र नेपाल वायुसेवा निगमका कार्यकारी अध्यक्ष युवराज अधिकारीलाई संयुक्तरूपमा प्रतिवेदन बुझाएको हो । 

समितिले बुझाएको प्रतिवेदनमा मुख्यगरी चार ओटा बुँदा समावेश गरिएको छ । पहिलो बुँदामा आन्तरिक लेखा परीक्षण प्रभावकारी बनाउने, दोस्रोमा सञ्चालक समितिको निर्णय र निगमको सुशासन प्रभावकारी बनाउन लेखा समिति बनाउने रहेको छ । 

त्यस्तै, तेस्रोमा निगमलाई आर्थिक रूपले प्रभावकारी बनाउन सोल्टी होटेलको सेयर बिक्री गर्ने रहेको छ । चौथो बुँदामा निगमको यथार्थपरक व्यावसायिक कार्ययोजना बनाउने प्रतिवेदनमा उल्लेख गरिएको छ । प्रतिवेदनलाई प्रभावकारी कार्यान्वयनका लागि मन्त्री किरातीले निगमका कार्यकारी अध्यक्षलाई निर्देशन दिएको छ ।