काठमाडौं । नेपाल क्रिकेट संघ (क्यान)ले नेपाली पुरुष तथा महिला क्रिकेट खेलाडीको वर्गीकरण गरेको छ । क्यानको यही फागुन १२ र १४ गते बसेको केन्द्रीय कार्यसमितिको बैठकबाट उक्त वर्गीकरण गरिएको हो ।

क्यानले गरेको नयाँ वर्गीकरणमा पुरुषतर्फ ग्रेड ‘ए’मा रोहित पौडेल, सोमपाल कामी, करण केसी, दीपेन्द्रसिंह ऐरी, आसिफ शेख र कुशल भुर्तेल गरी ६ खेलाडीलाई समावेश गरिएको छ ।

ग्रेड ‘बी’मा कुशल मल्ल, गुलशन झा, भीम सार्की, ललितनारायण राजवंशी, आरिफ शेख र अविनाश बोहरा गरी ६ खेलाडी छन् ।

यस्तै, ग्रेड ‘सी’मा विनोद भण्डारी, अर्जुन साउद, सन्दीप जोरा र प्रतिस जिसी गरी चारजना छन् । ग्रेड ‘डी’मा पवन सर्राफ, सागर ढकाल, अनिल साह, विवेककुमार यादव, आकाश चन्द, बसिर अहमद र सूर्य तामाङ गरी सात खेलाडी छन् ।

क्यानले इमर्जिङ क्याटागोरीमा दिपेश कँडेल (कोसी प्रदेश), रुपेश सिंह (मधेस प्रदेश), रिजन ढकाल (वाग्मती प्रदेश), विपीन खत्री (गण्डकी प्रदेश), देव खनाल (लुम्बिनी प्रदेश), अर्जुन घर्ती (कर्णाली प्रदेश) र हेमन्त धामी (सुदूरपश्चिम प्रदेश)लाई राखेको छ ।

पुरुषतर्फ ग्रेड ‘ए’मा रहेका खेलाडीलाई मासिक एक लाख, ग्रेड ‘बी’कालाई ७० हजार, ग्रेड ‘सी’कालाई ५५ हजार, ग्रेड ‘डी’कालाई मासिक ३५ हजार र इमर्जिङ क्याटगोरीमा रहेका खेलाडीलाई मासिक २५ हजार रुपैयाँ तलब उपलब्ध गराइने क्यानले जनाएको छ ।

महिलातर्फ ग्रेड ‘ए’मा इन्दु वर्मा, रुबिना क्षेत्री र सीता रानामगर छन् । ग्रेड ‘बी’मा कविता कुँवर र ग्रेड ‘सी’मा पूजा महतो र अश्मिना कर्माचार्य छन् । यस्तै, ग्रेड ‘डी’मा अप्सरी बेगम, कविता जोशी, संगीता राई, काजोल श्रेष्ठ र विन्दु रावल छन् ।

महिलातर्फ इमर्जिङ क्याटगोरीमा सोनी पाख्रिन, खुसी डंगोल, ज्योत्सनिका मरासिनी, कञ्चन श्रेष्ठ, रुबि पोदार, सृष्टि जैसी, सम्झनाकुमारी खड्का र सना प्रविन छन् । 

क्यानले महिलातर्फ ग्रेड ‘ए’मा रहेकालाई मासिक ५० हजार, ग्रेड ‘बी’कालाई मासिक ३५ हजार, ग्रेड ‘सी’कालाई मासिक ३० हजार, ग्रेड ‘डी’कालाई मासिक २५ हजार र इमर्जिङ क्याटगोरीमा रहेका खेलाडीलाई मासिक २० हजार रुपैयाँ तलब उपलब्ध गराउनेछ ।