काठमाडौं । सहकारीको रकम हिनामिनाको आरोप लागेका गितेन्द्रबाबु राई (जीबी)ले सन् २०१९ मै मलेसियामा अपार्टमेन्ट खरिद गरेको खुलेको छ । जीबीनिकट एक व्यवसायीले दिएको जानकारीअनुसार २६ लाख रिङ्गिट अर्थात् हालको नेपाली सात करोड २३ लाख ५८ हजार रुपैयाँ बराबरको अपार्टमेन्ट खरिद गरेका हुन् ।

उनले मलेसियाको राजधानी क्वालालम्पुरस्थित देशापन्डनमा उक्त अपार्टमेन्ट खरिद गरेका हुन् । अपार्टमेन्टबाहेक राईले मलेसियाकै अर्को सहर साइबरजयामा एक सपिङ मार्ट समेत सञ्चालन गरेको ती व्यवसायीको दाबी छ ।

ती व्यवसायीले भने, “जीबीले सन् २०१९ मा नै अपार्टमेन्ट किनेका हुन् । त्यो कुरा पहिले नै हामीलाई भनेका थिए । त्योबाहेक उनको सपिङ मार्ट समेत छ ।” राईको अपार्टमेन्टबाट उक्त सपिङ मार्ट ३२.७ किलोमिटरको दूरीमा पर्छ ।

पोखरास्थित सूर्यदर्शन बचत तथा ऋण सहकारी संस्थाको १८ हजार बचतकर्ताको एक अर्ब ३५ करोड रुपैयाँ हिनामिना गरेको आरोप उनीमाथि छ । राई गएको भदौदेखि नै मलेसिया बसेको प्रहरीको दाबी छ ।

राईले पोखराबाहेक काठमाडौं, चितवन र बुटवलमा समेत सहकारी सञ्चालन गरेर निक्षेतकर्ताको रकम हिनामिना गरेको खुलेको छ । उनीसहित हाल सहकारी सञ्चालक समितिका अध्यक्ष थानबहादुर बुढामगर र पूर्वअध्यक्ष भुपेन्द्र राईविरूद्ध प्रहरीको अन्तर्राष्ट्रिय अपराध संगठन (इन्टरपोल)ले डिफ्युजन नोटिस जारी गरेको छ ।

• जीबी राईसहित सूर्यदर्शन सहकारीका चार जना पक्राउ गर्न प्रहरीले गुहार्दै इन्टरपोल

• सहकारीको अरबौं रकम ठगीकाे आरोप लागेका जीबी राई मलेसिया पुगेको आशंका, सम्पत्ति रोक्का 

डिफ्युजन नोटिसलाई रेड नोटिसमा कन्भर्ट गर्न थप प्रक्रिया प्रहरीले अगाडि बढाएको छ । मलेसियामै रहेको निष्कर्ष निकालेपछि प्रहरीले रेड नोटिसमा कन्भर्ट हुनासाथ इन्टरपोलको सहयोगमा पक्राउ गरेर नेपाल ल्याउने तयारी थालेको छ । प्रहरी उच्च स्रोतका अनुसार जीबीको लोकेट भइसकेका कारण केही दिनभित्रै पक्राउ गरेर ल्याउने बताए । 

सूर्यदशन सहकारी ठगी प्रकरणमा पोखरा प्रहरीले साउनदेखि अनुसन्धान थालेको थियो । अनुसन्धानका क्रममा १९ जनाले सहकारीको रकम अपचलन गरेको खुलेको थियो । हाल उक्त मुद्दा अदालत पुगेको छ । १९ जनामध्ये हाल पाँचजनालाई भने जिल्ला अदालत कास्कीले पुर्पक्षका लागि थुनामा पठाउने आदेश गरेको थियो । १४ जना अझै फरार छन् । सहकारी ठगी प्रकरणमा हाल राष्ट्रिय स्वतन्त्र पार्टीका सभापति रवि लामिछाने समेत पूरक जाहेरी परेको छ ।

पूरक जाहेरीबारे समेत कास्की प्रहरीले अनुसन्धान थालेको छ । काठमाडौं प्रहरीको सहयोगमा कास्की प्रहरीले माघ २४ मा काठमाडौंको शंखमुलस्थित राईको अर्को नेचर हब्स इन्टरनेशनल प्रालिको कार्यालयमा छापा मारेको थियो । उक्त कार्यालय पूर्वडीआईजी छविलाल जोशीको घरमा राखेका छन् ।

जोशीले उक्त घर मासिक दुई लाख रुपैयाँ लिनेगरी २०७८ असारदेखि भाडामा लगाएको छ । प्रहरीले नेचर हब्स कार्यालयबाट सूर्यदर्शन सहकारी र काठमाडौंस्थित स्वर्णलक्ष्मी सहकारीको डाटा सुरक्षण मेसिन (सर्भर) बरामद गरेको छ । डाटाबारे अनुसन्धान गर्न प्रहरीको केन्द्रीय अनुसन्धान ब्युरो (सीआईबी)को टोली समेत पोखरा पुगेको छ ।