काठमाडौं । सम्पर्क विहीन ग्यालेक्सी टेलिभिजनका सञ्चालक एवं पोखरा सूर्यदर्शन बचत तथा ऋण सहकारी संस्थाका अध्यक्ष गितेन्द्र राई ‘जीबी’ सहित चार जनालाई पक्राउ गर्न प्रहरीले इन्टरपोल गुहार्ने भएको छ ।

जिल्ला प्रहरी कार्यालय कास्कीले इन्टरपोलमार्फत पक्राउ गर्न आवस्यक प्रक्रिया अघि बढाएको हो । कास्की प्रहरीले जिल्ला अदालत कास्कीले पक्राउ पुर्जी जारी गरेको लामो समयसम्म पनि पक्राउ गर्न नसके पछि पक्राउ गर्न इन्टरपोलको सहयोग माग्न लागेको हो ।

त्यसको लागि कास्की प्रहरीले प्रहरी प्रधान कार्यालयको इन्टरपोल शाखालाई पत्राचार गरिसकेको कास्की प्रहरी प्रमुख एसपी मोहनकुमार थापाले जानकारी दिए । अब इन्टरपोल शाखाले इन्टरपोलको हेडक्वाटरलाई पत्राचार गर्ने छ ।

उनीहरू नेपाल छोडेर विदेश भागेको आशंका भएपछि इन्टरपोलमार्फत् ‘डिफ्युजन नोटिस’ जारी गर्न लागिएको हो ।

सहकारी संस्थाको रकम हिनामिना प्रकरणमा पहिलो चरणमा अध्यक्ष जीबी राईसहित पूर्वअध्यक्षद्वय भूपेन्द्र राई, थानबहादुर बुढा मगर र पूर्वसञ्चालक समिति सदस्य शिवबहादुर गुरूङविरूद्ध इन्टरपोलमार्फत् ‘डिफ्युजन नोटिस’ जारी गर्न लागिएको प्रहरीले जनाएको छ ।