गोदावरी । ललितपुरको गोदावरीमा नेपाली कांग्रेसको महासमिति बैठक सोमबारदेखि जारी छ । महासमिति सदस्यहरूलाई विभाजन गरेर चारवटा हलमा बैठकमा आएका प्रतिवेदनबारे छलफल गराइँदै छ ।

तर, अधिकांश महासमिति सदस्यलाई छलफलको चिन्ता देखिँदैन ।  तीन मिनेटमा आफ्ना कुरा राखेर हतारहतार बाहिर निस्कने, अरूको कुरा नसुनेरै हलबाहिर गफ लगाएर बस्ने प्रवृत्ति महासमिति सदस्यहरूमा  देखिएको छ ।

जसका कारण चारवटै हलहरू खाली हुन थालेका छन् । "जति बोले पनि हुँदैन । बोलेको लाग्दैन, कति बोल्ने ?," कञ्चनपुरका एक महासमिति सदस्यले भने ।

छलफल चलिरहँदा सुदूरपश्चिम प्रदेशको समूहका अर्का सदस्यले भने, "वीरबहादुर दाइ मलाई अलि परतिर जानुछ । म बोलेर हिँडिहालौँ भनेको, मलाई बोल्न दिनु न । एक महासमिति सदस्यले हड्बढाउँदै भनिन् ।"

कतिपय सदस्यले भने आफूहरूले बोल्न नपाएको, समय कम भएको र समयमा नाम टिपाउँदा पनि बोल्न नदिएको भन्दै आक्रोश पोख्ने गरेका छन् । यसै विषयलाई लिएर बुधबार अपराह्नतिर कोसी र सुदूरपश्चिम प्रदेशको छलफलमा विवाद भएको थियो ।