काठमाडौं । वरिष्ठ मुटुरोग विशेषज्ञ डा. ओम मूर्ति अनिलद्वारा गरिएको ‘धूम्रपान गर्ने स्वार्थी हुँदैनन्’ अभियानमा एक हजार ६०० व्यक्तिले धूम्रपान त्याग्ने प्रतिबद्धता जनाएका छन् । 

भ्यालेन्टाइन डे र सरस्वती पूजाको अवसर पारेर फेब्रुअरी १ देखि सुरु भएको अभियानमा सो संख्यामा प्रतिबद्धता आएको हो । डा. ओम मूर्ति फाउन्डेसनले मेरो एउटा सानो त्याग मायालुका लागि ठूलो उपहार भन्ने नारासहित धूम्रपानविरुद्धको १४ दिने अभियान चलाएको थियो । 

फाउन्डेसनको वेबसाइटमा राखिएको गुगल फर्ममा ७० प्रतिशत नेपालमा बस्ने र ३० प्रतिशत विदेशमा बस्ने नेपालीले प्रतिबद्धता जनाएका हुन् । 

धूम्रपानबाट व्यक्तिको शरीरमा पर्ने असरका बारेमा प्रभावकारी जानकारी पुर्‍याउन रचनात्मक ढंगले सचेतना अभियान चलाइएको डा. मूर्तिको भनाइ छ ।  त्यतिमात्र नभइ निष्क्रिय धूम्रपानले परिवारमा परिरहेको असरबारे सचेत गराउन समेत अभियानले महत्त्वपूर्ण भूमिका खेल्ने डा. अनिलको विश्वास छ । 

धूम्रपान गर्ने ५० प्रतिशतले पटक पटकको प्रयासमा समेत त्याग्न नसकिरहेको अध्ययनले देखाएका छन् । विशेष अवसर पारेर गरिरहेको प्रतिबद्धता अधिकतम् कार्यान्वयन हुने देखिएकाले पनि यस्ता अभियानले धूम्रपान त्याग्न प्रेरणा मिल्ने उनी बताउँछन् ।