चितवन । नेपाली कांग्रेसका महामन्त्री गगनकुमार थापाले कानुन सबैका लागि बराबर हुने बताएका छन् । नागरिक संवाद कार्यक्रमका क्रममा चितवन पुगेका उनले नारायणी नदी किनारमा सम्बोधन गर्दै कानुनभन्दा माथि कोही पनि नहुने बताए ।

कानुनको शासनमा सबैको सम्मान हुनुपर्ने उनको भनाइ थियो । उनले भने, “कानुन सबैका निम्ति बराबर हुन्छ ।”

महामन्त्री थापाले आगामी बजेट, निर्वाचन प्रणाली, स्वास्थ्य, शिक्षा, विकासलगायत विषयमा नागरिकको धारणा नागरिक संवादमार्फत बुझिरहेको बताए । जनताको भावनाअनुसार कांग्रेसले काम गर्न अभियान सञ्चालन गरिएको उनले बताए ।

कार्यक्रममा नेपाली कांग्रेसका जिल्ला सभापति राजेश्वर खनाल र क्षेत्रीय सभापति भरत लामिछानेले अभियानका विविध पक्षबारे बोलेका थिए । रासस