काठमाडौं । सडकमा बेहोस अवस्थामा भेटिएका काठमाडौंको गोठाटारमा कृषि फार्म सञ्चालन गर्ने युवाको मृत्यु भएको छ ।

बिहीबार गोठाटारकै सडकमा राती १२ बजेतिर बेहोस अवस्थामा फेला परेका ३३ वर्षीय दिलीप कट्टेलको वीर अस्पतालमा मृत्यु भएको हो ।

बानेश्वर प्रहरी प्रमुख डीएसपी शिवराज बुढाथोकीका अनुसार उनी मादक पदार्थ सेवन गरेको अवस्थामा फेला परेका थिए ।

प्रहरीले उनीसँगै बसेर मादक पदार्थ सेवन गरेका चार युवालाई घटनाबारे सोधपुछ गर्न नियन्त्रणमा लिएको छ । प्रहरीको नियन्त्रणमा रहेका युवाहरू मृतक कट्टेलकै साथी हुन् ।

कट्टेल बेहोस हुँदा उनका साथीहरू कहाँ थिए भन्नेबारे सोधपुछ गर्न प्रहरीले उनीहरूलाई  नियन्त्रणमा लिएको जनाएको हो । मृतकको शरीरको बाहिरी भागमा भने कुनै चोट देखिएको छैन ।

पोस्टमार्टम रिपोर्ट आएपछि प्रहरीले थप अनुसन्धान गर्ने जनाएको छ ।