काठमाडौं । नेकपा (एमाले) धादिङको विवाद छताछुल्ल भएको छ । यही माघ १९ गतेदेखि सुरु जिल्ला अधिवेशनमा प्रतिनिधि छनोट र अध्यक्षमण्डलको विषयको विवादले अधिवेशन अन्योलपूर्ण बनेको हो ।

अधिवेशनमा कुटाकुटकै अवस्था सिर्जना भएको छ । प्रदेश अध्यक्ष कैलाश ढुंगेल आइतबार बिहान अधिवेशन स्थगित भएको विज्ञप्ति निकालेर काठमाडौं फर्किएका छन् ।

• एमाले धादिङको अधिवेशनमा 'धक्कामुक्का', कार्यकर्ताको हात भाँचियो

‘काउन्टर’मा जिल्ला अध्यक्ष भूमि त्रिपाठीले अधिवेशन स्थगित नभएको भन्दै विज्ञप्ति जारी गरेका छन् ।

• एमाले धादिङ अध्यक्षले भने– अधिवेशन स्थगित भएको छैन

धादिङमा पार्टी अध्यक्ष केपी शर्मा ओलीनिकट नेताहरूबीच नै प्रतिस्पर्धा छ । अध्यक्षमा त्रिपाठी र रामकुमार अधिकारी आकांक्षी छन् । त्रिपाठीले प्रतिनिधि छनोटमा एकलौटी गरेको भन्दै अधिकारीलाई साथ दिएका नेताहरू असन्तुष्ट देखिएका हुन् ।

अधिकारीलाई प्रदेश अध्यक्ष ढुंगेल, खेम लोहनीलगायत नेताको साथ छ । लोहनीले प्रतिनिधिको अन्तिम नामावलीबारे अन्योल रहेको बताए ।

“प्रतिनिधि उपस्थित गराउने सवालमा विवाद पहिलेदेखि नै भएको थियो । भूगोलबाट आएका प्रतिनिधिहरूमा कुनै विवाद थिएन,” उनले बाह्रखरीसित भने, “जनसंगठन, विभाग र कमिटीबाट मनोनयन गर्ने विषयमा विवाद थियो । अध्यक्षले त्यसमा एकलौटी गर्नुभयो । प्रतिनिधिको अन्तिम नामावलीको रजिस्ट्रर गर्ने विषयमा विवाद थियो । अहिलेसम्म पनि को–को भन्ने धेरै बाहिर आएको छैन ।”

अध्यक्षमण्डलमा पनि विवाद भएकाले अधिवेशन स्थगित गरिएको उनले सुनाए । जिल्ला अध्यक्षले निकालेको विज्ञप्तिबारे माथिल्लो कमिटीको अध्यक्षको निर्देशन मान्नुपर्ने उनको भनाइ छ ।

“जिल्ला अध्यक्षले अरूको कुरा नसुनेको होला । पार्टीका प्रदेश इन्चार्जले स्थगित गर्नुभएको छ,” उनले भने, “हाम्रो पार्टी जनवादी केन्द्रीयतामा चल्छ । माथिल्ला कमिटीको निर्देशन तल्ला कमिटीले मान्नुपर्छ ।”

अध्यक्षमण्डलका अध्यक्ष धर्मदत्त देवकोटाले मनोनीत प्रतिनिधि र अध्यक्षमण्डल सर्वसम्मतिले टुंग्याइएको जिकिर गरे । अधिवेशनअन्तर्गत आइतबार बिहान ८ बजेदेखि बन्दसत्र सुरु गर्ने तयारी हुँदा प्रदेश अध्यक्षले विज्ञप्ति सार्वजनिक गरेको उनले बताए । आफूहरू छलफलमा नै रहेको उनले जानकारी दिए ।

पार्टी अध्यक्ष ओली र महासचिव शंकर पोखरेलसँग छलफल गरेर अधिवेशन सञ्चालन गरिने उनले बताए । “प्रदेश अध्यक्षले कहाँबाट विज्ञप्ति जारी गर्नुभयो रे भन्ने सुनेँ । हामी छलफलमा नै छौँ,” उनले भने, “पार्टी अध्यक्ष र महासचिवसँग छलफल गरेर अधिवेशन चलाउँछौँ ।”