नुवाकोट । नुवाकोटको ककनी गाउँपालिका–८ निवासी १२० वर्षीया बाटुली लामिछानेको मृत्यु भएको छ ।

श्वासप्रश्वासमा समस्या भएसँगै उपचारका क्रममा शुक्रबार घरमै उनको मृत्यु भएको उनका आफन्त उद्धव हुमागाईंले जानकारी दिए ।

उनका अनुसार, पछिल्लो एक सातादेखि ज्येष्ठ नागरिक लामिछानेलाई श्वासप्रश्वासमा समस्या देखिएको थियो । ककनी गाउँपालिका र उनको संरक्षण तथा रेखदेखमा सक्रिय बाला फाउन्डेसनले लामिछानेको घरमै चिकित्सक ल्याएर उपचार गराइँदै आएको थियो ।

बाटुली लामिछानेको चाहनाअनुसार शुक्रबार राति नै पशुपति आर्यघाटमा अन्तिम संस्कार पनि गरिएको छ । उनलाई ८२ वर्षीय छोरा नेत्रप्रसाद लामिछानेले दागबत्ती दिए ।

नेपाली नागरिकताको प्रमाणपत्रानुसार बाटुली लामिछानेको जन्म वि.सं. १९५९ चैत १० गते भएको हो । उनलाई विश्वकै ज्येष्ठ नागरिक घोषणाका निम्ति बाला फाउन्डेसनमार्फत आवश्यक पहल भइरहेको थियो । रासस