काठमाडौं ।  त्रिभुवन अन्तर्राष्ट्रिय विमानस्थलमा ‘डिउटी फ्रि सप’ (करमुक्त पसल) सञ्चालनको लागि दरखास्त दिने समय तेस्रो पटक थप गरिएको छ ।

विमानस्थलले अन्तर्राष्ट्रिय टर्मिनल भवनमा प्रस्थानतर्फको पहिलो तलामा २६.११ वर्गमिटर र आगमनतर्फ अध्यागमन कार्यालय नजिकै ७५.८ वर्गमिटर गरी १०१.९१ वर्गमिटरर क्षेत्रफलमा ‘करमुक्त पसल’ सञ्चालनका लागि दरखास्त आह्वान गरेको छ ।

नेपाल नागरिक उडड्यन प्राधिकरणले पहिलो पटक गत मंसिर ४ गते बोलपत्र आह्वान गर्दै एक महिने सूचना निकालेको थियो । उक्त समयमा कुनैपनि कम्पनीले आवेदन नदिएपछि प्राधिकरणले पुस ४ गते अर्काे सूचना निकाल्दै १५ दिन म्याद थप गरेको थियो । सो समय अवधिमा पनि आवेदन नपरेपछि पुनः पुस १९ मा ३० दिन समय थप गरेको थियो ।

उक्त समय अवधिमा पनि कुनैपनि कम्पनीले करमुक्त पसल सञ्चालनका लागि आवेदन दिएनन् । त्यसपछि प्राधिकरणले माघ १९ (आज) पुनः ३० दिनको म्याद थप गरेको हो ।

विमानस्थलमा पाँच वर्षका लागि ‘करमुक्त पसल’ सञ्चालनको सम्झौता गर्न लागिएको छ ।