काठमाडौं । बाँसबारी छालाजुत्ता कारखानाको १० रोपनी जग्गा निजी कम्पनीको नाममा नामसारी प्रकरणमा जोडिएका अजितनारायण थापालाई बिहीबार प्रहरीले पक्राउ गरेको छ । बाँसबारी छालाजुत्ता कारखानाको नाममा रहेको १० रोपनी जग्गा चौधरी ग्रुपले नियमविपरीत गएर निजी बनाएको खुलेको छ ।

सो प्रकरणमा नेपाल प्रहरीको केन्द्रीय अनुसन्धान ब्युरो (सीआईबी)को टोलीले व्यवसायी अरुण चौधरीलाई समेत आज बिहानै पक्राउ गरिसकेको छ । सरकारी जग्गा अरुण चौधरीको नाममा नामसारी गरिँदा छालाजुत्ताको सञ्चालक समितिका अध्यक्ष रहेका थापा समेत पक्राउ परेका हुन् । अदालतबाट पक्राउ पुर्जी जारी गरेर उनीहरूलाई नियन्त्रणमा लिइएको सीआईबी स्रोतको भनाइ छ ।

१० रोपनी जग्गा निजी कम्पनीमा नामसारी गरिँदाका कम्पनी रजिस्ट्रार कार्यालयका कर्मचारीमाथि समेत अनुसन्धान हुने जनाइएको छ ।