काठमाडौं । संस्कृति पर्यटन तथा नागरिक उड्डयनमन्त्री सुदन किरातीले नेपाल वायुसेवा निगमका कार्यकारी निर्देशक युवराज अधिकारीलाई तीनवटा प्रश्न गरेका छन् ।

बुधबार निगमको संरचनागत एवं व्यवस्थापकीय अध्ययन तथा सिफारिस समितिको प्रतिवेदन कार्यान्वयन गर्न बनेको अर्को समितिको प्रतिवेदन बुझ्दै मन्त्री किरातीले अधिकारीलाई तीनवटा प्रश्न गरेका हुन् ।

मन्त्रालयका अनुसार मन्त्री किरातीले अधिकारीलाई विगतमा बनेको समितिले तयार गरेको प्रतिवेदन किन कार्यान्वयन नभएको भनेर प्रश्न गरेका थिए । प्रतिवेदन कार्यान्वयन भएको भए कुन चरणमा पुगेको छ भनेर त्यसको कार्य प्रगति विवरण बुझाउन भनेका थिए । किरातीले न्यारोबडी जहाजको सिट भाँचिएको दुई हप्तासम्म मर्मत नभएकोबारे पनि प्रश्न गरेका थिए ।

जवाफमा निर्देशक अधिकारीले हरेक प्रतिवेदन कार्यान्वयनको चरणमा रहेको र सबैको यथार्थ विवरण पेस गर्ने जवाफ दिएका थिए । त्यस्तै, जहाजको सिट बनाउनका लागि कानुनी प्रक्रियाका कारण समय लागेको र अबको केही दिनमै मर्मत हुने जवाफ दिएको मन्त्रालयले जनाएको छ ।

मन्त्री किरातीले आगामी दिनमा हरेक प्रतिवेदन र मन्त्रालयबाट भएको निर्देशनको स्पष्ट जवाफ र प्रगति विवरण आफूलाई चाहिने र आफूले सोही अनुसार प्रधानमन्त्रीलाई प्रगति विवरण पेस गर्ने बताएका थिए ।

निगम सुधारका लागि पूर्वगर्भनर दिपेन्द्रबहादुर क्षेत्री नेतृत्वको समितिको प्रतिवेदन कार्यान्वयनका लागि पूर्वपाइलट कुलबहादुर लिम्बु नेतृत्वको समितिले आज मन्त्री किरातीलाई तेस्रो मासिक प्रतिवेदन पेस गरेको हो ।