काठमाडौं । कानुन, न्याय तथा संसदीय मामिलामन्त्री धनराज गुरुङले आफूमाथि नैतिकताको प्रश्न उठाएको भन्दै सांसदहरूसँग आक्रोश पोखेका छन् ।

आइतबार कानुन, न्याय तथा मानव अधिकार समितिको बैठकमा उनले केही नेपाल ऐनलाई संशोधन गर्न बनेको विधेयकमाथिको छलफलमा भाग लिने सांसदहरूको अभिव्यक्तिप्रति आपत्ति जनाएका हुन् ।

बैठकमा समितिका सदस्यहरूले उक्त विधेयक अपराधीहरूलाई प्रश्रय दिने प्रावधानसहित सरकारले सुटुक्क ल्याएको जिकिर गरेका थिए । त्यसको जवाफ दिने क्रममा मन्त्री गुरुङले विनाकारण आफ्नो नैतिकता र नियतमाथि प्रश्न उठाउने काम नगर्न सांसदहरूलाई आग्रह गरे ।

उनले पटकपटक छलफल गरेर उक्त विधेयक संसद् र संसदीय समितिमा आउँदा पनि आफूमाथि गलत नियतका साथ प्रस्तुत भएको बताए । मन्त्री गुरुङले आफूहरूले सांसदहरूको कार्यक्षमतामाथि प्रश्न नगर्ने भन्दै घुमाउरो भाषामा शब्दकोश अध्ययन गर्न आग्रह गरे ।

"आफ्नो कुरा राख्न नजानेको, शब्द नपाएको हो भने नेपाली शब्दकोश भण्डारमा थुप्रै शब्दहरू छन्, सभापति महोदय । अनि छिराएको । के भनेको त्यो ? खुसुक्क छिराएछ । सारा पिजनहोलमा राखेर, पढनोस् भनेर । सैद्धान्तिक छलफल गरेर दफादफा छलफल गरिरहेका छौँ । तैपनि सुटुक्क छिराएको भन्ने ? जस्केलबाट छिराएको छ । हुँदाहुँदा झ्यालबाट छिराएछ । बडो गजब छ बा," उनले भने ।

मन्त्री गुरुङले आफूले मुलुकमा सुशासन स्थापना गर्दै नागरिकलाई सम्पन्न बनाउने लक्ष्य लिएको र त्यसैमा अविचलित भएर अघि बढने पनि बताए ।

न्युज एजेन्सी नेपाल