काठमाडौं । स्पेनिस ला लिगाको क्लब बार्सिलोनाका मुख्य प्रशिक्षक जाभी हर्नान्डेजले सिजनको अन्त्यपछि क्लब छोड्ने घोषणा गरेका छन् ।

जाभीले शनिबार राति भएको खेलमा बार्सिलोनाले भियारियालसँग ५–३ को हार बेहोरेपछि यस्तो निर्णय सुनाएका हुन् ।

सन् २०२१ को नोभेम्बरमा कतारी क्लब अल सादको जिम्मेवारी छोड्दै जाभीले बार्सिलोनाको प्रशिक्षण सम्हालेका थिए । जाभीले सन् २०२२–२३ को सिजन बार्सिलोनालाई ला लिगा च्याम्पियन बनाएका थिए । तर, यस सिजन स्वभाविक लयका निम्ति संघर्षरत बार्सिलोना ला लिगामा शीर्ष स्थानको रियाल मड्रिडभन्दा १० अंकले पछि छ ।

“म यो क्लबको मान्छे हुँ । मैले यसलाई आफूभन्दा पनि धेरै प्राथमिकतामा राखेको छु । मैले क्लबका लागि सक्दो सबै दिए,” जाभीले भने, “र, म समर्थकलाई गौरवान्वित बनाउन यो कार्य निरन्तर गर्नेछु । मलाई क्लबलाई गतिशिल बन्न परिवर्तन आवश्यक छ । क्लबको निर्देशन बोर्डको भलाईका लागि, मैले छोड्नु राम्रो हो ।”

यसअघि जाभीले सुपर कपको फाइनलमा रियाल मड्रिडसँग ४–१ को हार बेहोरेपछि क्लबले विश्वास गुमाए आफूले जिम्मेवारी त्याग्ने बताएका थिए ।

बार्सिलोनाका पूर्व खेलाडी समेत रहेको जाभीले सन् १९९८ देखि २०१५ सम्म गरी १७ वर्ष क्याटालन क्लबको सिनियर टोलीमा बिताएका थिए ।