काठमाडौं । दुई शतक बनेको खेलमा मधेस प्रदेशले प्रधानमन्त्री कप पुरुष राष्ट्रिय क्रिकेट प्रतियोगितामा सुदूरपश्चिम प्रदेशविरुद्ध ८० रनको फराकिलो जित निकालेको छ ।

कीर्तिपुरस्थित त्रिवि क्रिकेट मैदानमा सम्पन्न खेलमा मयन यादवले शतक बनाएपछि टस जितेर ब्याटिङमा आएको मधेसले निर्धारित ५० ओभरमा नौ विकेट गुमाएर ३१९ रनको योगफल खडा गरेको थियो । ३२० रनको लक्ष्यसहित मैदान उत्रिएको सुदूरपश्चिमबाट नरेन भट्टले शतक बनाए पनि टिमको हार टार्न भने सकेनन् । सुदूरपश्चिमले ४४.५ ओभरमा सबै विकेट गुमाएर २३९ रनमात्र जोडेपछि मधेसले ८० रनको जित दर्ता गरेको हो । 

सुदूरपश्चिमका नरेनले १२२ बलमा १३ चौका र एक छक्कासहित १२१ रन बनाए । नरेनबाहेक अन्यले भने उल्लेख्य योगदान पुर्‍याउन सकेनन् । नारायण जोशीले २६, किरण ठगुन्नाले २०, खड्क बोहराले १४ र गजेन्द्र बोहराले १२ रन थपे ।

मधेसका राजेश यादव र प्रदीप पासवानले समान तीन विकेट लिए । रञ्जित कुमारले दुई विकेट लिँदा हरिशंकर साह र पवन सर्राफले समान एक विकेट लिए ।

त्यसअघि पहिले ब्याटिङमा आएको मधेसको खातामा मयनले ११५ रन जोडे । उनले १२८ बलमा आठ चौका र दुई छक्का प्रहार गरे । पवन सर्राफले ६३ बलमा समान चार चौका र छक्कासहित ७० रन थपे । अनिल साहले ६९, रुपेश सिंहले २१, अभिषेक तिवारीले १६ र कप्तान हरिशंकर साहले १४ रन जोडे ।

सुदूरपश्चिमका शेर मल्लले चार विकेट लिए । विकाश आग्रीले दुई विकेट लिँदा नारायण जोशी र गजेन्द्र बोहराले समान एक विकेट हात पारे ।

जितसँगै ६ खेलबाट आठ अंक जोडेको मधेस तालिकाको तेस्रो स्थानमा उक्लिएको छ । चार खेलबाट ६ अंक जोडेको सुदूरपश्चिम तालिकाको चौथो स्थानमा छ । प्रतियोगितामा सुदूरपश्चिमको यो पहिलो जित हो ।

सोमबार नै भएको अर्को खेलमा ललितनारायण राजवंशी चम्किँदा नेपाल पुलिस क्लबले अर्को विभागीय टोली एपीएफ क्लबविरुद्ध ५८ रनको जित निकालेको छ । 

सिद्धार्थनगरमा सम्पन्न खेलमा ललितले पाँच विकेट लिएपछि पुलिसले दिएको १४६ रनको लक्ष्य पछ्याएको एपीएफ ३४ ओभरमा ८७ रनमै समेटिएको थियो । 

जितसँगै तालिकाको शीर्ष स्थानमा उक्लिएको पुलिसले चार खेलबाट आठ अंक जोडेको छ । समान खेलबाट चार अंक जोडेको एपीएफ तालिकाको छैटौँ स्थानमा छ ।