काठमाडौं । अर्थमन्त्री डा. प्रकाशशरण महतले मुलुकको अर्थतन्त्र विस्तारै लयमा फर्कन लागेको बताएका छन् । शनिबार नुवाकोटमा आयोजित कार्यक्रममा उनले आफूले अर्थ मन्त्रालयको जिम्मेवारी लिँदा समस्याको पहाड रहेको भन्दै अहिले मुलुकको अर्थतन्त्र विस्तारै लयमा फर्कन लागेको बताएका हुन् ।

हिसाबकिताब नदेखिने र दायित्वमाथि दायित्व सिर्जना हुने अवस्थाको अन्त्य गर्न खोज्दा स्वार्थ समूह बेखुसी रहेको उनले सुनाए । उनले बजेट व्यवस्थापन विस्तारै ‘सिस्टम’मा ल्याउने जिकिर गरे ।

जग्गा कारोबार चलायमान भएको, नेप्से परिसूचक उकालो लागेको र धेरै वर्षपछि उच्च संख्यामा पर्यटक भित्रिएको उनले उल्लेख गरे ।

अर्थमन्त्री डा. महतले देशको आर्थिक अवस्थाले मात्र पत्रकारिता समस्यामा नपरेको टिप्पणी गरे । पत्रकारिता समस्यामा पर्नुको मूल कारण सामाजिक सञ्जाल भएको उनको भनाइ छ ।

कार्यक्रममा गोविन्द वियोगी पत्रकारिता पुरस्कार, २०८० बाट वरिष्ठ पत्रकार एवं राष्ट्रिय समाचार समिति (रासस)का पूर्वअध्यक्ष कुलचन्द्र वाग्लेसहित चारजनालाई सम्मान गरियो । वाग्लेसहित पत्रकारहरू जीवराम भण्डारी, शरण उत्सुक सापकोटा र मन्टेश्वरी राजभण्डारी सम्मानित भएका हुन् । हिमालयन टेली भ्वाइस