काठमाडौं । जनता समाजवादी पार्टी (जसपा)का अध्यक्ष उपेन्द्र यादवले प्रदेशको नामकरण संघीयताविपरीत भएको टिप्पणी गरेका छन् । बुधबार साँझ मधेस प्रदेश सरकारले प्रदेशको नाम घोषणाको स्मरणमा आयोजना गरेको स्वाभिमानी दिवस कार्यक्रममा उनले यस्तो बताएका हुन् ।

उनले मधेसबाहेकको नाम संघीयताविपरीत राजा महेन्द्रको पथमा नामकरण गरिएको आरोप लगाए । उनले पहिचानमा आधारित प्रदेश मधेस मात्र रहेको जिकिर गरे । संघीयताविपरीत नामकरण गरिएकाले कोसी प्रदेशको नाम जनताले अस्वीकार गरेको उनको भनाइ थियो ।

“प्रदेशको नामकरण संघीयताको विपरीत भएको छ । कोसी प्रदेशका जनताले नाम अस्वीकार गरे । जनता सडकमा लडेर सहादत प्राप्त भए,” उनले भने, “पहिचानमा आधातिर संघीयताको सिद्धान्तविपरीत नाम राखिएको छ । पहिचानको आधारमा नभएपछि कोसी प्रदेशका जनताले नाम अस्वीकार गरे ।”

अध्यक्ष यादवले मधेस प्रदेशको मुख्य चुनौती भ्रष्टाचार रहेको बताए । उनले प्रदेशको समुन्नत विकासका निम्ति सुुशासन अपरिहार्य रहेको भन्दै भ्रष्टाचारविरुद्ध निर्मम भएर काम गर्न आग्रह गरे । न्युज एजेन्सी नेपाल