काठमाडौं । अफ्रिका कप अफ नेसन्समा नामिबियाले ट्युनिसियाविरुद्ध १–० को सनसनीपूर्ण जित निकालेको छ । 

मंगलबार आइभेरी कोस्टको अमाडोउ गोन कौलीबाली रंगशालामा सम्पन्न खेलमा ट्युनिसियाविरुद्ध जित दिलाउन नामिबियाका डियोन काभेन्जीले निर्णायक गोल गरे । काभेन्जीले खेलको निर्धारित समय सकिन दुई मिनेट बाँकी रहँदा गोल गर्दै नामिबियालाई अग्रतामा राखेका थिए । यही गोल निर्णायक बन्दा नामिबियाले प्रतियोगिताको उपाधि दाबेदारविरुद्ध सनसनीपूर्ण जित निकालेको हो । विश्व फुटबलको सर्वोच्च निकाय फिफा वरीयतामा ट्युनिसिया २८औं स्थानमा र नामिबिया ११३औं स्थानमा छ ।

जितसँगै तीन अंक जोडेको नामिबिया समूह ‘इ’ को दोस्रो स्थानमा उक्लिएको छ । अप्रत्यासित हार व्यहोरेको ट्युनिसिया तालिकाको तेस्रो स्थानमा छ ।

मंगलबार नै सम्पन्न समूहको अर्को खेलमा मालीले दक्षिण अफ्रिकाविरुद्ध २–० को जित निकालेको छ । मालीको जितमा हमरी ट्रोरे र लासिन सिनायोकोले गोल गरे । 

जितसँगै तीन अंक जोडेको माली तालिकको शीर्ष स्थानमा उक्लिएको छ । दक्षिण अफ्रिका भने समूहको पुछारमा छ ।