काठमाडौं । एएफसी एसियन कपको आफ्नो पहिलो खेलमा जोर्डनले मलेसियाविरुद्ध ४–० को सहज जित निकालेको छ । सोमबार कतारको अल जनौब रंगशालामा जोर्डनलाई जिताउन महमोउद अल–मार्दी र मुसा अल–तमारीले समान दुई गोल गरे ।
 
खेलको १२औँ मिनेटमा मार्दीले गोल गर्दै जोर्डनलाई अग्रतामा राखेका थिए । त्यसको ६ मिनेटपछि नै तमारीले प्राप्त पेनाल्टी सदुपयोग गरेपछि जोर्डनले अग्रता दोब्बर बनायो । ३२औँ मिनेटमा मार्दीले दोस्रो गोल गरेपछि जोर्डनले पहिलो हाफमा ३–० को अग्रता बनाएको थियो ।

खेलको निर्धारित समय सकिन पाँच मिनेट बाँकी रहँदा तमारीले गोल गरेपछि जोर्डनले ४–० को सहज जित निश्चित गर्‍यो ।

जितसँगै तीन अंक जोडेको जोर्डन समूह ‘इ’को शीर्ष स्थानमा उक्लिएको छ । पहिलो खेलमै फराकिलो हार व्यहोरेको मलेसिया तालिकाको पुछारमा छ । यो समूहमा जोर्डन र मलेसियासँगै दक्षिण कोरिया र बहराइन छन् ।

सोमबार नै भएको समूह ‘डी’को खेलमा इराकले इन्डोनेसियाविरुद्ध ३–१ को जित निकाल्यो । इराकको जितमा मोहनाद अली, ओसामा रासिद र आयुमेन हुैनले गोल गरे । इन्डोनेसियाका मासेलिनो फर्डिनानले गोल फर्काएका थिए ।

जितसँगै तीन अंक जोडेको इराक तालिकाको दोस्रो स्थानमा उक्लिएको छ । हारबाट प्रतियोगिताको सुरुआत गरेको इन्डोनेसिया पुछारमा छ । यो समूहमा इराक र इन्डोनेसियासँगै जापान र भियतनाम छन् ।