काठमाडौं । देशमा हाल पानी पर्ने सम्भावना न्यून रहेको मौसम पूर्वानुमान महाशाखाले जनाएको छ । महाशाखाले सोमबार बेलुका जारी गरेको मौसम पूर्वानुमान बुलेटिनमा आज राति कोसी, वाग्मती र गण्डकी प्रदेशका पहाडी भू–भागका एक/दुई स्थानमा हल्का वर्षाको सम्भावना रहेको उल्लेख छ ।

तर, त्यो सम्भावना न्यून रहेको महाशाखाकी मौसमविद् प्रतिभा मानन्धरले बताइन् । “बुलेटिनमा पहाडी भू–भागका एक/दुई स्थानमा हल्का वर्षाको सम्भावना भने पनि त्यो न्यून सम्भावना हो । पानी परिहाले पनि एक/दुई ठाउँमा छिटपुट र थोरै समय पर्ने हो,” उनले बाह्रखरीसित भनिन्, “तत्काल ‘ठूलो’ पानी पर्ने देखिँदैन । ‘राम्रो’ वर्षाको सम्भावना छैन ।”

छिटपुटदेखि हल्का वर्षा भइहाले पनि त्यसलाई ठूलो रूपमा नलिइने उनले बताइन् । हल्का वर्षाले किसानलाई भने केही राहत हुन सक्ने उनको भनाइ छ ।

• कति भयो नेपालमा पानी नपरेको, के हो कारण ?

उनका अनुसार, हाल देशमा पश्चिमी वायुको आंशिक प्रभाव छ । बंगलादेशको दक्षिण भू–भाग आसपास रहेको न्यूनचापीय प्रणालीको समेत आंशिक प्रभाव रहेको उनले बताइन् ।

यो सिजनमा पानी पार्ने मजबुत प्रणाली नेपाल नभित्रिएको उनले जानकारी दिइन् । “जाडोमा पानी पार्ने राम्रो सिस्टम आएको छैन,” उनले भनिन्, “पानी पार्ने प्रणालीको अध्ययन र विश्लेषण गरिरहेका छौँ ।”

अबका तीन दिन देशभर ‘ठूलो’ पानी पर्ने सम्भावना नरहेको उनले बताइन् । यो अवधिमा काठमाडौंमा पनि वर्षाको सम्भावना नरहेको उनको भनाइ छ ।

महाशाखाले सोमबार बेलुका ६ बजे जारी गरेको मौसम पूर्वानुमान बुलेटिन पढ्नोस्–

मौसम विश्लेषण (Meteorological Analysis):

हाल नेपालमा पश्चिमी वायुको आंशिक प्रभाव रहेको छ। साथै हाल बंगलादेशको दक्षिण भू-भाग आसपास रहेको न्यून चापीय प्रणालीको समेत आंशिक प्रभाव रहेको छ ।

हाल मौसमको अवस्था (Present Weather Status):

हाल देशको पहाडी भू-भागमा आंशिक बदली रहेको छ । साथै तराईका अधिकांश स्थानहरूमा हुस्सु/कुहिरो लागेको छ।

२०८० माघ १ गते (सोमबार)

राती:  देशको पहाडी भू-भागमा आंशिक देखि साधारणतया बदली रही बाँकी भू-भागमा मौसम मुख्यतया सफा रहनेछ। कोशी, बागमती र गण्डकी  प्रदेशका पहाडी भू-भागका एक-दुई स्थानमा हल्का वर्षाको सम्भावना रहेको छ। देशका उच्च पहाडी तथा हिमाली भू-भागका थोरै  स्थानहरुमा हल्का हिमपातको सम्भावना रहेको छ।

२०८० माघ २ गते (मंगलबार)

दिउँसो: देशका पहाडी भू-भागमा आंशिक देखि साधारणतया बदली रही बाँकी भू-भागमा आंशिक बदली देखि मौसम मुख्यतया सफा रहनेछ। देशका पहाडी भू-भागका एक-दुई स्थानमा हल्का वर्षाको सम्भावना रहेको छ। देशका उच्च पहाडी तथा हिमाली भू-भागका थोरै स्थानमा  हल्का हिमपातको सम्भावना रहेको छ।

राती:  देशको पहाडी भू-भागमा आंशिक देखि साधारणतया बदली रही बाँकी भू-भागमा आंशिक बदली देखि मुख्यतया सफा रहनेछ। कोशी, गण्डकी र कर्णाली  प्रदेशका पहाडी भू-भागका एक-दुई स्थानमा हल्का वर्षाको सम्भावना रहेको छ। देशका उच्च पहाडी तथा हिमाली भू-भागका एक-दुई स्थानमा  हल्का हिमपातको सम्भावना रहेको छ।

२०८० माघ ३ गते (बुधबार)

दिउँसो:  कोशी, बागमती ,गण्डकी, कर्णाली र सुदूरपश्चिम प्रदेशका पहाडी भू-भागमा साधारणतया बदली रही बाँकी भू-भागमा आंशिक बदली देखि मौसम मुख्यतया सफा रहनेछ। कोशी, बागमती ,गण्डकी, कर्णाली र सुदूरपश्चिम प्रदेशका पहाडी भू-भागका थोरै स्थानहरुमा र लुम्बिनी प्रदेशको पहाडी भू-भागका एक-दुई स्थानमा हल्का वर्षाको सम्भावना रहेको छ। कोशी, बागमती, गण्डकी, कर्णाली र  सुदूरपश्चिम प्रदेशका उच्च पहाडी तथा हिमाली भू-भागका थोरै  स्थानहरुमा हल्का हिमपातको सम्भावना रहेको छ।

राती:  बागमती प्रदेशको पहाडी भू-भागमा आंशिक बदलीका साथै कोशी, गण्डकी, कर्णाली र सुदूरपश्चिम प्रदेशका पहाडी भू-भागमा साधारणतया बदली रही बाँकी भू-भागमा आंशिक बदली देखि मौसम मुख्यतया सफा रहनेछ। कोशी,गण्डकी र कर्णाली  प्रदेशका पहाडी भू-भागका थोरै स्थानहरूका साथै बागमती र सुदूरपश्चिम प्रदेशका पहाडी भू-भागका एक-दुई स्थानमा हल्का वर्षाको सम्भावना रहेको छ। कोशी, गण्डकी र कर्णाली  प्रदेशका उच्च पहाडी तथा हिमाली भू-भागका थोरै स्थानहरूका साथै  बागमती र सुदूरपश्चिम प्रदेशका उच्च पहाडी तथा हिमाली भू-भागका एक-दुई स्थानहरुमा हल्का हिमपातको सम्भावना रहेको छ।

आगामी २४ घण्टाका लागि चेतावनी तथा परामर्श (Warning/Advisory for next 24 hours)

देशका पहाडी भू-भागका एक-दुई स्थानमा हल्का वर्षाको सम्भावना रहेको छ ।देशका उच्च पहाडी तथा हिमाली भू-भागका थोरै  स्थानहरुमा हल्का हिमपातको सम्भावना रहेको छ। साथै तराईका अधिकांश स्थानहरूमा हुस्सु/कुहिरो लागेको  हुँदा दैनिक जनजीवन, स्वास्थ्य, यातायात तथा हवाई यातायातमा प्रभाव पर्न सक्ने भएकोले त्यसबाट हुन सक्ने असरका साथै चिसोबाट समेत बच्न आवश्यक उपायहरू तथा सतर्कता अपनाउनुहुन  अनुरोध छ।