काठमाडौं । लिग लिडर इन्टर मिलानले इटालियन सिरी ‘ए’मा मोन्जाविरुद्ध ५–१ को सहज जित निकालेको छ ।
यू पावर रंगशालामा सम्पन्न खेलमा इन्टरलाई जित दिलाउन लौटारो मार्टिनेज र हाकन चाल्ननोलुले समान दुई गोल गरे । यस्तै, अर्को एक गोल भने मार्कुस थुरमले गरे । घरेलु टिमका माटेओ पेसिनाले एक गोल गरेका थिए ।
खेलको १२औँ मिनेटमा चाल्ननोलुले गोल गर्दै इन्टरलाई अग्रता दिलाएका थिए । त्यसको दुई मिनेटपछि नै मार्टिनेजले पाहुना टिमको अग्रता दोब्बर पारे ।
खेलको ६०औँ मिनेटमा रफाइल पालाडिनोले रातो कार्डको दर्शन गर्दै मैदान छाडेपछि घरेलु टिम १० खेलाडीमा समेटिएको थियो । सोही मिनेटमा चाल्ननोलुले दोस्रो गोल गरेपछि इन्टरले अग्रतालाई ३–० मा पुर्याएको थियो । ६९औँ मिनेटमा पेसिनाले प्राप्त पेनाल्टी सदुपयोग गरेपछि मोन्जाले इन्टरको अग्रतालाई ३–१ को अवस्थामा झारेको थियो ।
तर, ८४औँ मिनेटमा लौटारो मार्टिनेजले पनि प्राप्त पेनाल्टीमा गोल गर्दै पाहुना टिमलाई ४–१ को अवस्थामा राखेका थिए । यस्तै, ८८औँ थुरमले गोल गरेपछि इन्टरले ५–१ को सहज जित सुनिश्चित गरेको हो ।
जितसँगै २० खेलबाट ५१ अंक जोडेको इन्टर तालिकाको शीर्ष स्थानमा छ । इन्टरलाई पछ्याइरहेको युभेन्ट्सले १९ खेलबाट ४६ अंक जोडेको छ । २० खेलबाट २५ अंक जोडेको मोन्जा तालिकाको ११औँ स्थानमा छ ।
-1743849429.jpg)
