काठमाडौं । तीन ट्वान्टी–२० को शृंखलाअन्तर्गत अफगानिस्तानले पहिलो खेलमा घरेलु टिमसँग ६ विकेटको हार व्यहोरेको छ । बिहीबार पञ्जाब क्रिकेट एसोसिएसनको मैदानमा अफगानिस्तानले प्रस्तुत गरेको १५९ रनको लक्ष्य भारतले १७.३ ओभरमा चार विकेट गुमाएर पूरा गरेको हो ।
भारतको जितमा शिभम दुबेले सर्वाधिक ६० रन बनाए । उनले ४० बलमा पाँच चौका र दुई छक्का प्रहार गरे । जितेस शर्माले ३१, तिलक बर्माले २६, ओपनर सुभमन गिलले २३ र रिंकु सिंहले १६ रन जोडे । घरेलु टिमका कप्तान रोहित शर्मा दुई बल खेलेर शून्यमा पेभिलियन फर्किएका थिए ।
अफगानिस्तानका मुजिव उर रहमानले दुई र अज्मतुल्लाह अमार्जाइले एक विकेट लिए ।
त्यसअघि, टस हारेर ब्याटिङ गरेको अफगानिस्तानले २० ओभरमा पाँच विकेट गुमाउँदै १५८ रन बनाएको थियो । मोहम्मद नावीले सर्वाधिक ४२ रन जोडे । ओमार्जाइले २९, कप्तान इब्राहिम जाद्रनले २५ र रहमानुल्लाह गुरर्वाजले २३ रन थपे ।
भारतका मुकेश कुमार र अक्षर पटेलले समान दुई विकेट लिए । शिभम दुबेले एक विकेट लिए ।
यो शृंखलाअन्तर्गत बाँकी दुई खेल आइतबार र जनवरी १७ मा हुनेछ ।
