टोकियो । जापानको इशिकावा प्रान्तमा गत सोमबार गएको ७.६ म्याग्निच्युडको भूकम्पका कारण मृत्यु हुनेको संख्या बढेर १०० पुगेको छ । भूकम्पमा परी इशिकावामा शनिबारसम्म २११ जना बेपत्ता रहेको स्थानीय सञ्चारमाध्यमले त्यहाँका अधिकारीलाई उद्धृत गर्दै उल्लेख गरेका छन् ।

यसैबीच, भूकम्पमा परी मृत्यु हुनेको संख्या ११० र बेपत्ताको संख्या २१० रहेको एएफपीले जनाएको छ ।

भूकम्पबाट सबैभन्दा धेरै प्रभावित तटीय सहर वाजिमामा ५९ जनाको मृत्यु पुष्टि भएकोे छ । भवन भत्कँदा वाजिमामा करिब १०० व्यक्ति फसेको अपुष्ट विवरण सार्वजनिक भएको छ ।

जापान मौसम विज्ञानसम्बन्धी निकाय (जेएमए)ले स्थानीय समयानुसार शनिबार बिहान ५ः२५ बजे नोटो क्षेत्रमा पुनः ५.४ म्याग्निच्युडको भूकम्प गएको जनाएको छ ।

यो क्षेत्रमा शनिबार वर्षाको सम्भावना रहेकोले स्थानीय बासिन्दालाई सतर्क रहन चेतावनी दिइएको छ ।

जापानको राष्ट्रिय समाचार संस्था (क्योदो)का अनुसार भूकम्पका कारण इशिकावाका पूर्वाधारमा ठूलो क्षति पुगेको छ ।

स्थानीय समयानुसार शनिबारसम्म २४ हजार घरधुरीले विद्युत् अवरोधको सामाना गर्नुपरेको छ ।  १४ सहरका ६६ हजार घरधुरी खानेपनीविहीनताको अवस्थामा छन् । रासस/सिन्ह्वा