सप्तरी । स्रोत नखुलेको पाँच लाख ३० हजार भारतीय रुपैयाँसहित प्रहरीले सप्तरीबाट एक भारतीय नागरिकलाई शनिबार पक्राउ गरेको छ ।

जिल्ला प्रहरी कार्यालय सप्तरीले आज पत्रकार सम्मेलन गरी राजगढ गाउँपालिका–२, झौराचोकबाट पक्राउ परेका भारतको मधुवनी भरफोर ग्राम पञ्चायत–३, सुब्बाटोलका २५ वर्षीय सञ्जयकुमार यादवलाई नगदसहित सार्वजनिक गरेको हो ।

जिल्ला प्रहरी कार्यालयबाट खटिएको टोलीले बीआर५०बी १५४२ नम्बरको मोटरसाइकल रोकी जाँच गर्दा यादवलाई स्रोत नखुलेको नगदसहित पक्राउ गरिएको जिल्ला प्रहरी कार्यालय सप्तरीका प्रहरी उपरीक्षक गजुसिद्दी ब्रजाचार्यले बताए । मोटरसाइकलको डिक्कीमा लुकाई भारु नेपालतर्फ ल्याउँदै गरेको अवस्थामा यादव पक्राउ परेका हुन् ।

उनको साथबाट भारु ५०० का ३३९ थान, २०० का ५३०, १०० का एक हजार ९८०, ५० का एक हजार ३४, २० का १९७, १० का ८८३ थान नोट फेला परेको छ । यस सम्बन्धमा प्रहरीले आवश्यक अनुसन्धान गरिरहेको जनाएको छ । रासस