काठमाडौं । खाद्य व्यवस्था तथा व्यापार कम्पनी लिमिटेडले दसैँ र तिहारका लागि ल्याएका ५४२ च्याङ्ग्रामध्ये २७८ बिक्री भएनन् । दसैँमा २६४ च्याङ्ग्रा बिक्री भएका थिए । दसैँ र तिहार पछिको समयमा हालसम्म खाद्य व्यवस्था तथा व्यापार कम्पनी वाग्मती प्रादेशीक कार्यालयले २३१ वटा च्याङ्ग्रा बिक्री गर्‍यो । तर, हाल बाँकी रहेका ४७ च्याङ्ग्रामध्ये २१ वटा मरे ।

प्रादेशिक कार्यालयका अनुसार यी च्याङ्ग्रा कुकुरको टोकाइबाट मरेका हुन् । बाँकी रहेका २६ वटा मध्ये १३ वटा पनि विरामी छन् । बाँकी १३ वटा भने सकुसल रहेको प्रादेशिक कार्यालय प्रमुख ज्ञानु थापा बताउँछिन् ।

“बुधबार बेलुकासम्म सबै च्याङ्ग्राहरू स्वस्थ नै थिए । राति च्याङ्ग्रा मरेकाले सीसीटिभी फुटेज हेरेर थाहा पाएका हौँ । ९ बजे मात्रै खबर भयो । मरेकामध्ये दुई वटाको परीक्षण पनि गरियो,”   उनले भनिन्, “च्याङ्ग्रा ल्याएको तीन महिना भइसक्यो । दसैँका लागि लक्षित गरेर ल्याएको हो । छुटमा बिक्री गर्दा ४७ वटा च्याङ्ग्रा बाँकी थियो ।”

गत वर्ष भने १६२ च्याङ्ग्रा बिक्री भएको थियो । गत वर्ष खरिद विभागले फिर्ता गर्ने सम्झौता गरेको थियो । तर, यो वर्ष भने फिर्ता गर्ने सम्झौता नगरेकाले च्याङ्ग्रा थापाथली प्रादेशिक कार्यालयमा राखिएको थियो ।

केन्द्रीय रिफरल पशु चिकित्सालयका पशुचिकित्सक डा. सुदीप रेग्मीमा अनुसार कुकुरले टोकेर खुन बढी बगेका कारण च्यांग्राको मृत्यु हुन सक्ने आशंका गरेका छन् । उनका अनुसार रेविज भने नदेखिएको उनको भनाइ छ ।

“च्याङ्ग्राको शरीरमा कुनै संक्रमण देखिएन । चारवटा कुकुरले घाँटीमा टोकेर बढी ब्लड बगेर च्याङ्ग्राको मृत्यु भएको जस्तो देखिन्छ,” उनले भने, “परीक्षणको क्रममा अरू केही संक्रमण देखिएन ।”