काठमाडौं । आठ महिनादेखि पारिश्रमिक नपाएको भन्दै चिकित्सा विज्ञान राष्ट्रिय प्रतिष्ठान (न्याम्स)का कर्मचारी आन्दोलित भएका छन् । न्याम्सका स्वास्थ्यकर्मी तथा कर्मचारीले शुक्रबार अस्पतालको आर्थिक तथा कर्मचारी प्रशासन शाखामा ताला लगाएका छन् ।

अस्पतालभित्रका नौवटा कर्मचारी संगठनले संयुक्त विज्ञप्ति जारी गर्दै नियमित तलबभत्ता तथा अतिरिक्त समय काम गरेको आठ महिनाको पारश्रमिक नपाएको जनाएका छन् । यसबारे पटकपटक न्याम्समा जानकारी गराउँदा समेत अस्पताल व्यवस्थापनले वास्ता नगरेको उनीहरूको आरोप छ । 

आर्थिक र प्रशासन शाखामा ताला लागेपछि अस्पताल प्रशासन र आन्दोलनरत कर्मचारीबीच छलफल सुरु भएको छ ।  “सफाइकर्मीसहित केही कर्मचारीको नियमित तलब पनि रोकिएको छ, अहिले उहाँहरूसँग छलफलमा जुटेका छौँ”, अस्पतालका निर्देशक डा. सन्तोष पौडेलले भने ।
 
बक्यौता पाश्रिमिक भुक्तानी नभएसम्म संयुक्त आन्दोलन अघि बढाउने कर्मचारीले चेतावनी दिएका छन् ।