काठमाडौं । नेकपा (एमाले)का पोलिट्ब्युरो सदस्य तथा सांसद गोकुल बाँस्कोटाले पहिचानवादीको आन्दोलनलाई अन्ध जातिवादको भद्दा नमुनाको संज्ञा दिएका छन् ।

उनले मंगलबार सामाजिक सञ्जालमार्फत फुटाउ र राज गर भन्ने पुरानो ‘फर्मुला’ पराजित गरिने उल्लेख गरेका छन् । 

“पहिचान र सामथ्र्यलाई सन्तुलन गर्ने र व्यवहारमा समावेशीतालाई खरो उतार्दै आएको एमाले पार्टीविरुद्धको पहिचानवादी भनिनेको निरन्तरको हर्कत केवल अन्ध जातिवाद, नश्लवाद र फाँसीवादको भद्दा नमुना हो,” उनले सामाजिक सञ्जालमा लेखेका छन्, “फुटाउ र राज गर भन्ने त्यो पुरानो फर्मुला इतिहासले पटक–पटक पराजित गरेको छ र फेरि पनि गर्छ ।” 

एमालेको संकल्प यात्रा आजबाट कोसी प्रदेश प्रवेश गरेको छ । एमालेको यात्रा अवरोध गर्न खोजेपछि पहिचानवादी नेता तथा पूर्वमन्त्री गोपाल किराँतीसहितलाई प्रहरीले पक्राउ गरेको छ ।