काठमाडौं । कोप २८ का अध्यक्ष सुल्तान अहमद अल जाबेरले जलवायु परिवर्तन न्यूनीकरणका निम्ति भइरहेको बहसलाई चाँडोभन्दा चाँडो अन्तिम निष्कर्षमा पुर्‍याउनुपर्नेमा जोड दिएका छन् । उनले प्रगति भइरहे पनि पर्याप्त र छिटो काम हुन नसकेको बताए ।

संयुक्त अरब इमिरेट्सको दुबईमा जारी जलवायु परिवर्तनसम्बन्धी संयुक्त राष्ट्रसंघीय संरचना महासन्धि पक्षहरूको सम्मेलनको २८औँ सत्रमा कोप २८ को पछिल्लो घटनाक्रमबारे जानकारी दिँदै उनले यस्तो टिप्पणी गरेका हुन् । उनले जलवायु परिवर्तनका मुद्दालाई गहन रूपमा लिएर खुला छलफल गर्न आवश्यक रहेको बताए । जलवायु परिवर्तनका मुद्दालाई निष्पक्ष र न्यायोचित रूपमा सम्बोधन गर्न आवश्यक रहेको उनले उल्लेख गरे ।

आफूले सो समाधानका निम्ति सबै देशहरू तयार हुनुपर्ने चाहेको उनले बताए । सबैजना लचिलो हुन र सम्झौता स्वीकार गर्न तयार हुनुपर्नेमा उनले जोड दिए ।

कोप २८ नोभेम्बर ३० देखि डिसेम्बर १२ सम्म चल्नेछ । सिन्ह्वा/न्युज एजेन्सी नेपाल