बेनी । ऊर्जा, जलस्रोत तथा सिँचाइमन्त्री शक्तिबहादुर बस्नेतले नेपाल बिजुली बिक्रीबाट आम्दानी गर्ने ठाउँमा पुगेको बताएका छन् । समाजवादी मोर्चा नेपाल म्याग्दीले शनिबार बेनीमा आयोजना गरेको सन्देशसभालाई सम्बोधन गर्दै ऊर्जामन्त्री बस्नेतले यस्तो बताएका हुन् ।
अबको दुई वर्षभित्र नेपालले विद्युत् बिक्रीबाट आम्दानी मात्र गर्ने र बिजुली खरिद गर्नु नपर्ने अवस्था आउने उनले बताए । नेपालबाट गत वर्ष १० अर्ब रुपैयाँको विद्युत् बिक्री भएको र २० अर्बको खरिद गरिएको उनले जानकारी दिए । मन्त्री बस्नेतले यो वर्ष नेपालले बिजुली बिक्रीबाट आम्दानी गर्ने दाबी गरे ।
“यो वर्ष हालसम्म १४ अर्बको विद्युत् बिक्री भइसकेको छ । जेठ र असारसम्म पुग्दा १८ अर्बसम्मको हामीले विद्युत् बिक्री गर्ने लक्ष्य राखेका छौँ । यो वर्ष नेपालले बाहिरबाट बढीमा १२ अर्बको मात्रै खरिद गरे पुग्छ । हामी यसै वर्षदेखि बिजुली बेचेर आम्दानी गर्ने अवस्थामा पुग्दै छौँ,” मन्त्री बस्नेतले भने ।
म्याग्दीका सबै घरधुरीमा केन्द्रीय विद्युतीकरणको पहुँच पुर्याउन आवश्यक बजेट विनियोजन गरेर कार्यक्रम अघि बढेको उनले जानकारी दिए । मन्त्री बस्नेतले नेपाल अँध्यारोमुक्त बन्ने बाटोमा रहेको बताए । म्याग्दीमा नेपाल विद्युत् प्राधिकरणले निर्माण गरिरहेको राहुघाट जलविद्युत् आयोजनमा स्थानीयलाई सेयरको सुनिश्चित गर्ने समेत उनले प्रतिबद्धता जनाए ।
मन्त्री बस्नेतले मुलुकको आर्थिक अवस्था सुधारको बाटोमा अघि बढेको जिकिर समेत गरे । “सरकार गठन हुँदाको अवस्था र अहिले धेरै फरक भएको छ । सबै सूचकहरूको विश्लेषण गर्दा मुलुकको आर्थिक अवस्था लयमा फर्कन लागेको देखिएको छ । यो सरकारले गरेको सकरात्मक काम हो,” मन्त्री बस्नेतले भने ।
उनले व्यापार घाटा न्यूनीकरण, मूल्यवृद्धि नियन्त्रण र रोजगारका अवसर सिर्जना गर्नेतर्फ सरकारले ध्यान केन्द्रित गरेको बताए ।
नेकपा (माओवादी केन्द्र)का उपमहासचिव समेत रहेका नेता बस्नेतले नेपालको नयाँ संविधानमा समाजवादोन्मुख अर्थव्यवस्थालाई स्वीकार गरेकाले अबको ध्यान समाजवाद निर्माणमा केन्द्रित हुने बताए । उनले समाजवादी मोर्चामा सरकार र सरकारबाहिरका दल समेत आबद्ध रहेकाले मुलुकमा समाजवाद निर्माण गर्न सरकार, संसद् र सडकबाट रचनात्मक भूमिका खेल्नुपर्ने धारणा राखे । रासस
