काठमाडौं । दुई गोलको अग्रता जोगाउन नसक्दा स्पोर्टिङ इलाम एफसीले शनिबार नेपाल सुपर लिग (एनएसएल)मा दोस्रो जित निकाल्ने अवसर गुमाएको छ । दशरथ रंगशालामा स्पोर्टिङ इलामले आफ्नो पाँचौँ खेलमा शनिकार दुई गोलको अग्रता जोगाउन नसक्दा धनगढी एफसीसँग २–२ को बराबरी नतिजा सामना गरेको हो ।
अन्तिम २१ मिनेटमा दुई गोल फर्काउँदै धनगढीले हारको संकट टार्यो । यो बराबरीसँगै अपराजित धनगढी चार खेलबाट आठ अंकसहित शीर्ष स्थानमा छ । समान खेलबाट पोखरा थन्डर्सको पनि समान आठ अंक छ । धेरै गोल गरेको आधारमा धनगढी शीर्ष स्थानमा पुगेको हो ।
स्पोर्टिङ इलाम भने पाँच खेलमा एक जित र एक बराबरीबाट चार अंकसहित छैटौँ स्थानमा छ ।
शनिबार खेलको ४४औँ मिनेटमा स्पोर्टिङ इलामले अग्रता लिएको थियो । अमाथ एन्डअले दिएको पासमा फोडे क्यामराले खाली पोस्टमा गोल गरे । पहिलो हाफको थप गरिएको समयमा इलामले अर्को गोल फर्कायो । नवीन लामाको कर्नर बललाई धनगढीका गोलकिपर ताहाले फुत्काएपछि ओमार मुस्ताफा थियमले वान टच गोल गरे । त्यससँगै पहिलो हाफमा स्पोर्टिङ इलामले २–० को अग्रता लियो ।
धनगढीले ६९औँ मिनेटमा पेनाल्टीमार्फत खेलमा फर्कने अवसर पायो । इलामका डिफेन्डर जितेले फोडे फोफानलाई लडाएपछि धनगढीले पेनाल्टी पायो । सो अवसरमा धनगढीका रिचर्ड अग्येमेङले गोल गर्दै खेल २–१ को अवस्थामा ल्याए ।
८३औँ मिनेटमा ओलावाले आफिजको हेडरमार्फत धनगढी २–२ को बराबरीमा फर्कियो । फोफानाले राइट कर्नरबाट दिएको बललाई आफिजले उत्कृष्ट हेडर गर्दै गोल गरे । न्युज एजेन्सी नेपाल
