काठमाडौं ।  ‘‘सबैका श्रीमतीको गलाभरी गहना हुन्छन् । मेरो श्रीमतीले चाहेर पनि त्यो लगाउन पाउँदिनन् । किनकि मैले किनेर उनलाई दिनै सकेको छैन । एक छोरा/एक छोरी छन् । उनीहरुलाई राम्रो स्कुलमा पढाउन पनि सक्दिनँ, त्यहीँ पीडाबोधले प्रहरीको सेवाप्रति बिरक्त लाग्यो,’’ रसियन आर्मी हुन पुगेका नेपाल प्रहरीका जवान राम माझी (नाम परिवर्तन) को दुखेसो हो, यो  ।

उनी प्रहरी जवानको तलबले घर धान्नै नसकिने निस्कर्षमा पुगे । उनी पैसा कमाउन जतिसुकै ठूलो चुनौती मोल्नसमेत तयार भए । त्यही बेला उनको फेसबुकमा आफूभन्दा एक सिनियर प्रहरी जवानलाई नेपाल प्रहरीको बर्दी होइन, रसियन आर्मीको बर्दीमा ठाटिएको देखे । 

हतार हतार फेसबुकको इनबक्समा म्यासेज गरे, ‘‘दाई कसरी रसिया पुग्नुभयो । म पनि जागिर छाडेर रसिया आउँछु ।’’

विना योजना पैसाकै लागि रसियन आर्मी हुन खोजेका रामलाई रसियन आर्मी भएर नेपाली तीन लाख कमाई हुने लोभ तिनै पूर्व प्रहरीले दिए । तीन लाख कमाईको सपना देखेका रामले आफू कार्यरत प्रहरी कार्यालयलाई १४ दिनको घर विदा स्वीकृत गराएर रसियाका लागि तयारी गरे । 

रसिया पुगेर आर्मी नै बनेकाहरूबाट उनलाई काठमाडौंबाट रसिया पठाउने एजेन्टको नम्बरसमेत दिए । त्यसरी रसिया पठाउने गिरोहका सदस्य थिए– पोखराका शंकर लिम्बु । उनी लिम्बुमार्फत् नै रसियाका लागि तयारी भए । 

लिम्बुले रामलाई रसिया पुग्न भिजिट भिसाको सहारा लिएका थिए । त्यो बापत उनले लिम्बुलाई पाँच लाख रुपैयाँ तिरे । उनी त्रिभुवन विमानस्थल हुँदै असोज १ मा दुबई उडे । नेपाल छाडेको दुई दिनमै उनी रसिया पुगे । काठमाडौंबाट भिजिट भिसामा रसिया पुगेपनि उनी त्यहाँ पुगेर आर्मी बन्नु थियो । मस्कोमा लिम्बुकै मानिस उनलाई लिन आए ।

मस्को पुगेको तीन दिनमै राम रसियन आर्मीका लागि छनोट क्याम्पमा पुगे । उनी आर्मीको छनोट क्याम्पमा पुग्दा उनीजस्तै अन्य नौजना नेपाली पनि आर्मी नै हुन त्यही क्याम्पमा पुगेका थिए । रसियन आर्मीले उनीहरुलाई तीन दिन मस्कोकै क्याम्पमा राख्यो । तीन दिनपछि भने उनीहरुलाई रसियाको अर्को सहर रस्तोप पुर्‍यायो । त्यहाँ उनीहरुको शारीरिक चेक जाँच भयो । हतियार चलाउन सिकायो । 

१५ दिन हतियार चलाउन सिकाएपछि उनीहरुलाई युद्धका लागि युक्रेनी भूमितिर पठायो । त्यतिबेलासम्म राम आर्थिक रुपमा आफ्नो जीवन परिवर्तन हुनेमा ढुक्क थिए ।

९ जनामा ३ जना अझै सम्पर्कविहीन

पैसा कमाउने लोभले प्रहरीको जागिर छाडेर रसियन आर्मी हुन पुगेका राम जोगिएर त फर्किए । तर, उनलाई ऋणको भार थपिएको छ । पैसा कमाउन रसियन आर्मी बनेका राम भाग्यबस भागेर बाँचेर नेपाल फर्किएका छन् ।

उनी ५ मंसिरमा नेपाल फर्किका हुन् । करिब दुई महिना काम गरेपछि भागेर नेपाल फर्किएको जानकारी उनले दिए ।  आफूहरुसँगै रसियन आर्मी भएका ९ जनामध्ये दुई जना घाइते अवस्थामा नेपाल फर्किएको र तीन जना भने युद्धकै क्रममा बेपत्ता भएको उनी बताउँछन् ।

“हामी रसियन आर्मीबाट युक्रेनसँग लड्न बाख्मुथ क्षेत्र पुगेका थियौँ । म लगायत त्यो समूहमा ९ जना नेपाली थियौं । तर, पछि तीन जना सम्पर्कमै आएनन् । उनीहरु जीवित छन् जस्तो लाग्दैन,” राम भन्छन् ।

युद्धको अवस्था भयावह र नेपालीको अवस्था निकै कठिन भएको उनको भनाइ छ । आफूलाई सूचना आएअनुसार रुसी सेनामा पाँच सय नेपाली भन्दा बढी भर्ना भएको उनको दाबी छ । अब पैसा भन्दा आफै जोगिएर नेपाल फर्किन पाएकामै उनी आफूलाई भाग्यमानी ठान्छन् ।

उनका अनुसार, सेनामा भर्ती भएका नेपालीलाई युद्धमोर्चाको अग्रभागमा खटाउने हुँदा बाँच्ने सम्भव अत्यन्त कम हुन्छ । रुसी सेनामा हाल नेपाली सेना र सशस्त्र प्रहरी बलबाट समेत जागिर छाडेर जानेहरुको संख्या बढेको छ ।

सेनामा भर्ती हुन रुस पुगेर फर्किकाहरुको गुनासोका आधारमा हाल प्रहरीले रुस पठाउने गिरोहलाई धमाधम पक्राउ गर्न थालेको छ । काठमाडौं प्रहरीले बुधबार मात्रै १२ जनालाई पक्राउ गरी सार्वजनिक गरेको छ । रामसहितलाई रुस पठाउने गिरोहको समेत खोजी भइरहेको प्रहरीले जनाएको छ ।

(नेपाल प्रहरीका जवान रसियाबाट फर्किएर फेरि ड्युटीमै फर्किएको हुनाले आफ्नो नाम गोप्य राख्ने सर्तमामात्रै बाह्रखरीसँग कुरा गर्न तयार भएकाले उनको नाम परिवर्तन गरी राखिएको हो)