विराटनगर । विराटनगरमा एक कबाडी गोदाममा आज अपराह्न भएको आगलागीमा परी एकजनाको मृत्यु भएको छ ।

विराटनगर–७ स्थित जलजला मोडमा रहेको गोदाममा आगलागी भएको थियो । जिल्ला प्रहरी कार्यालय मोरङका अनुसार आगो नियन्त्रणमा लिने क्रममा पाँचजना घाइते भएका थिए ।

घाइतेमध्ये न्युरो अस्पतालमा उपचाररत विराटनगर महानगरपालिका–७ का ३० वर्षीय दिपक मण्डलको मृत्यु भएको जिल्ला प्रहरी कार्यालय मोरङका प्रवक्ता डीएसपी रञ्जनकुमार दाहालले जानकारी दिए ।

आगलागीमा परेकामध्ये तीनजनाको अवस्था गम्भीर छ ।‌ आगलागी नियन्त्रणका लागि विराटनगरसहित सुनसरीबाट दमकल मगाइएको थियो ।