काठमाडौं । प्रधानमन्त्री पुष्पकमल दाहाल ‘प्रचण्ड’ले व्यवस्थालाई पछाडि फर्काउने कोसिस गरिएको बताएका छन् । छैटौँ सामाजिक सुरक्षा दिवसका अवसरमा सोमबार काठमाडौंमा आयोजित कार्यक्रममा उनले देशमा अराजकता निम्त्याउने कोसिस गरिएको बताए ।

“मानिसहरूले अहिले संघीय लोकतान्त्रिक गणतन्त्र, समाजवादउन्मुख राज्यव्यवस्था निर्माणका प्रक्रियाविरुद्ध कहीँ कतैबाट प्रश्न उठाउने, समाजमा भ्रम सिर्जना गर्ने, अराजकता सृष्टि गर्ने कोसिस भएका छन्,” उनले भने ।

उनले प्रणाली निरन्तर अघि बढ्ने पनि बताए । “इतिहासको चक्कालाई पछाडि धकेल्ने कोसिस देखिएका छन् । तर, तथ्य के हो भने इतिहास जहिले पनि अग्रगमनतिरै अघि बढ्छ । पछि फर्कंदैन । हामी जबसम्म यो परिवर्तनका वाहक राजनीतिक दलहरू, नेताहरू, संघसंस्था, बुद्धिजीवी नागरिक, निजी क्षेत्र र सार्वजनिक क्षेत्रका व्यक्ति हुन्छौँ, इतिहास पछि फर्कंदैन, अघि बढ्छ,” प्रधानमन्त्रीले भने ।

उनले हिजो मात्र सुकुम्वासी समस्या समाधान गर्न महत्त्वपूर्ण निर्णय गरिएको बताए । विश्वमा नेपालको हक, अधिकार स्थापित गर्ने अभियानमा आफूहरू रहेको उनले सुनाए । संयुक्त राष्ट्रसंघको महासभामा जलवायु परिवर्तनको समस्या भयानाक हुँदै गएको आफूले बताएको उनले उल्लेख गरे ।

दुबईमा हुने कोप–२८ मा आफू भिक माग्न जान नलागेको उनले बताए । अधिकार स्थिापित गर्न त्यहाँ जान लागेको उनको भनाइ छ ।

“त्यहाँ गएर हामीले नेपालको अधिकार स्थापित गर्नु छ । हाम्रो हक हो त्यो । हामी त्यहाँ भिक माग्न जाँदै छैनौँ,” प्रधानमन्त्री प्रचण्डले भने, “नेपाली जनताले नगरेको कर्मको फल भोग्नुपर्ने जो स्थिति छ, त्यो स्थितिको अन्त्यका निम्ति आवाज उठाउनेतिर जाँदै छौँ ।”