काठमाडौं । नेपाल सुपर लिग (एनएसएल)को दोस्रो संस्करणमा ‘डेब्युट्यान्ट’ वीरगन्ज युनाइटेड एफसी र साविक उपविजेता धनगढी एफसीबीचको पहिलो हाफ १–१ को बराबरीमा सकिएको छ ।

आइतबार त्रिपुरेश्वरस्थित दशरथ रंगशालामा जारी खेलमा फोडे फोफानाले गोल गर्दै धनगढीलाई अग्रता दिलाएका थिए । खेलको दोस्रो मिनेटमै अफिज ओलावालेको क्रसमा पेनाल्टी बक्सभित्र ‘अनमार्क’ रहेका फोफानाले वान टच ‘फिनिसिङ’ दिए ।

गोल बेहोरेपछि लगातार आक्रमण बुने पनि वीरगन्जले पहिलो हाफमा बराबरी गोल भेटाउन इन्जुरी समय कुर्नुपर्‍यो । पहिलो हाफको इन्जरी समयमा हान्स कोफीले पेनाल्टीमा गोल गर्दै वीरगन्जलाई खेलमा फर्काएका थिए । १८ यार्ड बक्सभित्र धनगढीका डियाग्ने फालोउको ह्यान्ड भएपछि वीरगन्जले पेनाल्टीको अवसर पाएको थियो । जसमा कोफीले कुनै गल्ती गरेनन् ।

त्यसअघि नवौँ मिनेटमा वीरगन्जले खेललाई बराबरीमा ल्याउने अवसर गुमायो । विलियम ओपकु अ‍ैसेडुको प्रहार रक्षक रिचार्ड ओसेइ अक्ष्वेमाङलाई लाग्दै बाहिरिएपछि धनगढीको खतरा टरेको थियो ।

१३औँ मिनेटमा वीरगन्ज पुनः गोल गर्नबाट चुक्यो । बक्सभित्र अभिषेक गुरुङलाई बिट गर्दै विशोन गुरुङले गरेको प्रहार गोल बाहिरिन पुग्यो ।

२६औँ मिनेटमा वीरगन्जले तेस्रो अवसर गुमायो । तेज तामाङको कर्नरमा अ‍ैसेडुको फ्री हेडरले पोस्टको दिशा लिन सकेन ।

मंसिर ८ गतेदेखि सुरु भएको प्रतियोगितामा कुल नौ टिमको सहभागिता छ । प्रतियोगिताको यस सिजन काठमाडौं रेजर्स, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगन्ज एफसी, ललितपुर सिटी एफसी, बुटवल लुम्बिनी र पोखरा थन्डर्सले खेलिरहेका छन् ।

प्रतियोगिताको पहिलो संस्करणको उपाधि काठमाडौं रेजर्सले जितेको थियो ।

प्रतियोगिताका सबै खेल त्रिपुरेश्वरस्थित दशरथ रंगशालामा हुने छन् ।

आयोजक नेपाल स्पोर्ट्स एन्ड इभेन्ट म्यानजमेन्टले प्रतियोगिताका लागि साधारणतर्फ ३०० र विशिष्टतर्फ ५०० रुपैयाँ टिकट मूल्य तय गरेको छ ।