काठमाडौं । नेपाल सुपर लिग (एनएसएल)को दोस्रो संस्करणमा पोखरा थन्डर्स र ललितपुर सिटी एफसीले विजयी सुरुआत गरेका छन् । शनिबार भएको खेलमा पोखराले एफसी चितवनलाई र ललितपुरले बुटबल लुम्बिनी एफसीलाई हराएको हो ।

त्रिपुरेश्वरस्थित दशरथ रंगशालामा सम्पन्न खेलमा पोखरालाई जित दिलाउन मोसेस त्वमले निर्णायक गोल गरे । त्वमले ७२औँ मिनेटमा गोल गर्दै पोखरालाई अग्रतामा राखेका थिए ।

आजै भएको दोस्रो खेलमा ललितपुर सिटी एफसीले बुटबल लुम्बिनी एफसीविरुद्ध २–० को जित निकालेको हो । दशरथ रंगशालामा भएको खेलमा ललितपुरलाई जित दिलाउन कप्तान अनन्त तामाङ र दीनेश हेन्जनले गोल गरे ।

२६औँ मिनेटमा दीनेशले गरेको गोलबाट ललितपुरले अग्रता बनाएको थियो । त्यसको ६ मिनेटपछि कप्तान अनन्तले ललितपुरको अग्रतालाई दोब्बर बनाएका थिए ।

जितसँगै तीन अंक जोडेको ललितपुर तालिकाको शीर्ष स्थानमा उक्लिएको छ । समान तीन अंक जोडेको पोखरा तालिकाको दोस्रो स्थानमा छ ।

प्रतियोगितामा आइतबार वीरगञ्ज युनाइटेड एफसी र धनगढी एफसीबीच प्रतिस्पर्धा हुनेछ । मंसिर ८ गतेदेखि सुरु भएको प्रतियोगितामा कुल नौ टिमको सहभागिता छ ।

प्रतियोगिताको यस सिजन काठमाडौं रेजर्स, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगञ्ज एफसी, ललितपुर सिटी एफसी, बुटवल लुम्बिनी र पोखरा थन्डर्स सहभागी छन् ।

एनएसएलको पहिलो संस्करणको उपाधि काठमाडौं रेजर्सले जितेको थियो । प्रतियोगिताका सबै खेल त्रिपुरेश्वरस्थित दशरथ रंगशालामा हुनेछ । आयोजक नेपाल स्पोर्ट्स एन्ड इभेन्ट म्यानजमेन्टले प्रतियोगिताका लागि साधारणतर्फ ३०० र विशिष्टतर्फ ५०० रुपैयाँ टिकट मूल्य तय गरेको छ ।