काठमाडौं । माइतीघर मण्डला र राष्ट्रपति कार्यालय आसपास निषेधाज्ञाविरुद्ध सर्वोच्च अदालतमा परेका रिट आज न्यायाधरीश डा. आनन्दमोहन भट्टराईको इजलासमा परेको छ । 

गत मंगलबार अधिवक्ताहरू भद्रप्रसाद नेपाल र प्रेमप्रसाद शिलवालले छुट्टाछुट्टै दायर गरेका रिट बुधबार र बिहीबार हेर्न नभ्याइनेमा परेका थिए । बुधबार नहकुल सुवेदीको इजलासमा र बिहीबार डा. मनोजकुमार ढुंगानाको इजलासमा परेका थिए । 

बुधबार १६ औं नम्बरमा परेका रिट बिहीबार २८औं नम्बरमा परेका थिए । शुक्रबार भने न्यायाधीश भट्टराईको इजलासको २२औं नम्बरमा रिट परेका छन् । अधिवक्ताद्वय भद्रप्रसाद नेपाल र प्रेमप्रसाद शिलवालले निषेधाज्ञा लगाउने आदेश गैरसंवैधानिक भएको भन्दै खारेजीको माग गर्दै रिट दायर गरेका थिए । 

जिल्ला प्रशासन कार्यालयले मंसिर–७ मा व्यवसायी दुर्गा प्रसाईं र नेकपा एमालेको युवा संगठन राष्ट्रिय युवा संघले एकसाथ आन्दोलनको घोषणा गरेपछि जिल्ला प्रशासन कार्यालय काठमाडौंले थप ३० दिनसम्म राष्ट्रपति कार्यालय तथा माइतीघर मण्डला आसपासका क्षेत्रमा निषेधाज्ञा जारी गरेको थियो । 

सर्वोच्च अदालतले यसअघि नै ओली नेतृत्वको नेकपाको सरकारका समयमा तत्कालीन गृहमन्त्री रामबहादुर थापाले जारी गरेको निषेधाज्ञाविरुद्ध वरिष्ठ अधिवक्ता दिनेश त्रिपाठीसहितको रिटमा सरकारको निर्णय खारेज हुनेगरी फैसला गरिसकेको छ ।