काठमाडौं । नेपाल सुपर लिग (एनएसएल) को दोस्रो संस्करणमा स्पोर्टिङ इलाम डे मेची एफसीका मुख्य प्रशिक्षक मेघराज केसीले देशको आर्थिक मन्दीको असर टिमको प्रशिक्षणमा पनि परेको बताएका छन् ।

प्रतियोगिताको दुई दिनअघि बुधबार आयोजित पत्रकार सम्मेलनमा प्रशिक्षक केसीले राष्ट्रिय टिमको प्रशिक्षण, दसैँ–तिहार र नेपालको आर्थिक स्थितिले टिमको प्रशिक्षणलाई प्रभावित बनाएको बताएका हुन् ।

“व्यावसायिक प्रशिक्षक र खेलाडी भएपछि एक क्बलमात्र भन्ने हुँदैन । जहाँ राम्रो हुन्छ त्यहाँ जाने हो । एनएसएल नेपालमा दोस्रोपटक हुँदै छ । यसप्रकारको फुटबलमा हामी आफैँ सिक्दै छौँ । सिक्ने कुरामा जुन क्लब भए पनि फरक पर्दैन,” प्रशिक्षक केसीले भने, “करिब तीन हप्तादेखि तयारी गरिरहेका छौँ । राष्ट्रिय टिम, चाडबाड र नेपालको आर्थिक मन्दीले गर्दा प्रशिक्षणमा केही फरक परेको छ । आम्दानी कम र खर्च ज्यादा भएकाले पनि तयारीमा असर परेको जस्तो लाग्छ ।”

उनले प्रतियोगिताका लागि तयारी आशअनुरूप भएको भन्दै टिमको तालमेल राम्रो रहेको बताए ।

“टिममा व्यावसायिक खेलाडी छन् भने सेट गर्न दुई हप्ता पनि पर्याप्त हुन्छ । हाम्रो टिममा विदेशी खेलाडी पनि योङ छन् । नेपाली खेलाडी पनि राम्रो छन् । हाम्रो तयारी सबै राम्रो छ, टिमको तालमेल राम्रो मिलिसक्यो । क्लबको आर्थिक स्थिति सहिद स्मारक 'ए' लिग खेलिरहेका क्लबभन्दा राम्रो छ,” उनले थपे ।

यस्तै, टिमका मार्की खेलाडी विकेश कुथुले क्लबलाई प्रतियोगिताको च्याम्पियन बनाउने लक्ष्य रहेको बताए ।

“गत सिजन काठमाडौंबाट स्टार जित्यौँ । यस पटक इलामबाट पनि स्टार जित्ने लक्ष्य छ । इलामले मलाई रोजेकोमा प्रशिक्षक र क्लबलाई धन्यवाद । म क्लबको विश्वास फिर्ता गर्ने छु,” विकेशले भने ।

मंसिर ८ गतेदेखि पुस १४ गतेसम्म काठमाडौंमा हुने प्रतियोगितामा ९ टिम सहभागी छन् । प्रतियोगिताको यस सिजन काठमाडौंसँगै, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगञ्ज एफसी, ललितपुर सिटी एफसी, बुटवल लुम्बिनी र पोखरा थन्डर्सले खेल्ने छन् ।