काठमाडौं । फुटबल क्लब चितवनका मुख्य प्रशिक्षक मेहराजुदिन वडुले नेपाल सुपर लिग (एनएसएल) पनि भविष्यमा भारतीय सुपर लिग (आईएसएल) जस्तै प्रतिस्पर्धात्मक बन्ने आशा व्यक्त गरेका छन् ।

प्रतियोगिताको दुई दिनअघि बुधबार आयोजित पत्रकार सम्मेलनमा भारतीय टिमका पूर्व खेलाडीसमेत रहेका वडुले एनएसएल विस्तारै आईएसएलजस्तै बलियो बन्ने विश्वास व्यक्त गरेका हुन् ।

“नेपालमा यो मेरो पहिलोपटक हो । यसका लागि उत्साहित छु । प्रशिक्षण राम्रो भइरहेको छ । नयाँ देशमा आउँदा चुनौती हुन्छ । तर, त्यसका लागि तयार छु,” उनले भने, “भारतीय फुटबल र नेपाली फुटबलमा खेलाडीको स्तरबाट पनि धेरै फरक छ । म यहाँ आलोचनाका लागि आएको हैन । तर, नेपाली फुटबलभन्दा भारतले धेरै प्रगति गरेको छ । एनएसएलको कन्सेप्ट आईएसलको जस्तै छ । आईएसएल पनि सुरुमा यस्तै थियो । तर, अहिले प्रतिस्पर्धात्मक लिग बनेको छ । एनएसएल सुरुआती चरणमा छ । विस्तारै यो पनि भारतीय लिगजस्तै हुनेछ भन्ने विश्वास छ ।”

यस्तै, चितवनका मार्की खेलाडी विशाल श्रेष्ठले एनएसएलले खेलाडीलाई खेल्ने अवसर दिएको भन्दै आयोजकलाई धन्यवाद दिए ।

“खेलाडीको रूपमा हामी विभिन्न टिमबाट खेल्छौँ । तर, जहाँ भए पनि हामी जित्नका लागि खेल्ने हो । हामी खेलाडीलाई एनएसएल हुँदै छ भन्ने कुरा ठूलो हो । एनएसएलले खेल्ने अवसर दिएको छ । यसका लागि धन्यवाद दिन चाहन्छु,” विशालले भने ।

मंसिर ८ गतेदेखि पुस १४ गतेसम्म काठमाडौंमा हुने प्रतियोगितामा ९ टिम सहभागी छन् । प्रतियोगिताको यस सिजन काठमाडौंसँगै, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगञ्ज एफसी, ललितपुर सिटी एफसी, बुटवल लुम्बिनी र पोखरा थन्डर्सले खेल्ने छन् ।