काठमाडौं । नेपाल सुपर लिग (एनएसएल) दोस्रो संस्करणमा साविक विजेता काठमाडौं रेजर्सले उपाधिको लक्ष्य राखेको छ ।

प्रतियोगिताको दुई दिनअघि आयोजित पत्रकार सम्मेलनमा टिमका मुख्य प्रशिक्षक बालगोपाल महर्जनले साविक विजेताको हैसियतले यो वर्ष पनि स्टार थप्ने प्रतिक्रिया दिए ।

“साविक विजेताको हैसियतले यो वर्ष पनि स्टार थप्ने योजना छ । नेपाली टिमका खेलाडी, विदेशी र सबै खेलाडीको कम्बिनेसन (संयोजन) बाट खुसी छु । पहिलो सिजन पनि विदेशी खेलाडी र स्थानीय खेलाडीको समिश्रणबाट उपाधि जितेका थियौँ,” प्रशिक्षक महर्जनले भने, “काठमाडौं रेजर्सलाई समर्थनका लागि सबैलाई आग्रह गर्दछु । प्रशिक्षण हामीले नोभेम्बर १ देखि गरेका थियौँ । टिममा विदेशी खेलाडीको रूपमा क्यामरुनबाट तीन खेलाडी र उज्वेकिस्तानबाट दुईजना खेलाडी छन् ।”

यस्तै, टिमका मार्की खेलाडी हिसुब थपलियाले विदेशी खेलाडीको आगमनले टिम बलियो बनेको बताए ।

“जिम्मेवारी पक्कै पनि छ । काठमाडौं साविक विजेता पनि हो । तयारी राम्रो भइरहेको छ । सोचेजस्तो हुन्छ भन्ने आश छ । टिम राम्रो बनेको छ । विदेशी खेलाडीको आगमनले टिम बलियो बनेको छ,” हिसुबले भने । 

मंसिर ८ गतेदेखि पुस १४ गतेसम्म काठमाडौंमा हुने प्रतियोगितामा ९ टिम सहभागी छन् । प्रतियोगिताको यस सिजन काठमाडौंसँगै, धनगढी एफसी, बुटबल लुम्बिनी एफसी, स्पोर्टिङ इलाम डे मेची एफसी, चितवन एफसी, झापा एफसी, वीरगञ्ज एफसी, ललितपुर सिटी एफसी, बुटवल लुम्बिनी र पोखरा थन्डर्सले खेल्ने छन् ।