विराटनगर । नेपाली कांग्रेसका नेता डा. शेखर कोइरालाले गणतन्त्र आफैँमा खराब व्यवस्था नभएको बताएका छन् । यसलाई सही ढंगले अघि बढाउन भने राजनीतिक दलका नेताहरू चुकेको उनको भनाइ छ ।

उनले गणतन्त्र ल्याउन सबै नेपाली र नेतृत्वको उत्तिकै योगदान रहेको उल्लेख गरे । तर, राजनीतिक दलका नेता चुकेकाले जनता निराश बनेको उनले बताए ।

“हामीले केको लागि र किन राजनीति गर्ने ? समाजलाई कसरी अगाडि बढाउन सकिन्छ भनेर गर्ने हो । तर, १०/१५ वर्षमा देश कता पुग्यो ? व्यवस्था परिवर्तन भएपछि यस्तै हुन्छ भन्नेहरू पनि छन्, जनताले खोजेको के हो ? समाजलाई राजनीतिज्ञले कसरी समाज अगाडि बढाउँछन् भन्ने खोजेका हुन्,” उनले भने, “कताकता हामी चुकिरहेका छौँ । कारण के हो भन्ने पत्ता लगाउनुपर्ने भएको छ ।”

भ्रष्टाचार, दण्डहीनताजस्ता विषयले जनतामा निराशा बढाएको उनले बताए ।

शिक्षा क्षेत्रका कमजोरीका कारण युवापुस्ता बाहिर गइरहेको उनको बुझाइ छ । युवा पलायन बढ्दै गए नेपाल बुढाहरूको देश बन्ने जोखिम बढेको टिप्पणी गरे ।

उनले भने, “सामुदायिक विद्यालय सुधारका लागि धेरै काम गर्नुपर्नेछ । अंग्रेजी माध्यममा पढाउने भन्दै यस्ता विद्यालयले शुल्क लिन थालेका छन् ।”