काठमाडौं । नेकपा (माओवादी केन्द्र) निकट अखिल नेपाल खेलकुद महासंघका सहअध्यक्ष जनक बर्तौलामाथि खुकुरी प्रहार गर्ने तीनजनालाई प्रहरीले सार्वजनिक गरेको छ । उनीहरूलाई काठमाडौं प्रहरीले शुक्रबार सार्वजनिक गरेको हो ।

पक्राउ पर्नेमा बाँके कोहलपुर नगरपालिका–१० का २४ वर्षीय शेरबहादुर थारू, झापा मेची नगरपालिका–८ का कैलाश भन्ने टेकबहादुर प्रधान र कोहलपुर–१ का आशिष लामिछाने मगर छन् ।

उनीहरूले तीन महिनाअघिदेखि नै बर्तौलामाथि खुकुरी प्रहार गर्ने योजना बनाएको खुलेको काठमाडौंका एसपी कुमोध ढुंगेलले जानकारी दिए ।

प्रहरीका अनुसार बर्तौलालाई शेरबहादुर थारूले खुकुरी र रड प्रहार गरेको खुलेको छ । थारूले प्रहार गर्नेबेला आशिषसमेत उनीसँगै थिए ।

खुकुरी र रड प्रहारपछि उनीहरू हुलिया परिवर्तन गरेर भागेका थिए । प्रहरीले समात्ने डरले उनीहरू झापा पुगेका थिए । उनीहरूलाई टेकबहादुर प्रधानले झापा पुउर्‍याएको खुलेको छ ।

पक्राउ परेका तीनैजना यसअघिसमेत लागुऔषध, ज्यान मार्ने उद्योग र हातहतियार खरखजना मुद्दामासमेत पक्राउ परेर छुटेको खुलेको छ ।

दुईलाख ३० हजार रुपैयाँ सुपारी दिएर अपांग गर्ने योजना !

प्रहरीले पक्राउ गरेका तीनजना नै सुपारी लिएर बर्तौलालाई आक्रमण गरेर अपांग बनाउने योजनासहित प्रयोग भएको खुलेको छ ।

अनुसन्धानका खटिएका एक प्रहरीका अनुसार पूर्वमाओवादीकै एक लडाकुको योजनामा बर्तौलामाथि आक्रमण भएको हो ।

अनुसन्धान संलग्न ती अधिकारीले भने, "पुरानै रिसइबीका कारण दुई लाख ३० हजार रुपैयाँ सुपारी लिएर बर्तौलामाथि आक्रमण भएको देखिन्छ । उनीहरूको मुख्य उद्देश्य भनेकै बर्तौलाई अंगभंग गर्ने देखिन्छ ।"

आक्रमणको योजनाकार भने भागेर भारत पुगेको खुलेको छ ।

२२ कार्तिकमा बानेश्वर आईप्लेक्स नजिकै बर्तौलामाथि आक्रमण भएको थियो । घाइते बर्तौलाको नर्भिक अस्पतालमा भर्ना भएका थिए । उनी खतरामुक्त छन् ।