काठमाडौं । कैलालीको टीकापुर घटनाका दोषी हरिनाथ चौधरी र वीरबहादुर चौधरीलाई कैद माफी दिने निर्णयविरुद्धको रिट शुक्रबार सर्वोच्च अदालतका न्यायाधीश कुमार रेग्मीको इजलासमा परेको छ ।

उक्त रिट गएको कात्तिक २३ र २४ गते न्यायाधीश प्रकाशमान सिंह राउतको इजलासमा ‘हेर्न नभ्याइने’ सूचीमा परेको थियो । तिहार बिदापश्चात् अदालत खुलेपछि रिट न्यायाधीश रेग्मीको इजलासमा परेको हो ।

रिटमा कैलाली जिल्ला कारागार, राष्ट्रपतिको कार्यालय, प्रधानमन्त्री तथा मन्त्रिपरिषदको कार्यालय, गृह मन्त्रालय, कारागार व्यवस्था विभागसहित हरिनाथ र वीरबहादुरलाई विपक्षी बनाइएको छ ।

टीकापुरमा हत्या गरिएका प्रहरी निरीक्षक केशव बोहराकी पत्नी शारदाले गएको जेठ १७ गते रिट दायर गरेकी थिइन् । संविधान दिवसका दिन सोही जेठ १५ गते उनीहरूलाई कैद माफी दिइएको थियो । उक्त रिटमा न्यायाधीश राउतको इजलासले जेठ २३ गते कारण देखाऊ आदेश जारी गरेको थियो । त्यो रिटको पेसी भने आउँदो पुस १४ गतेका निम्ति तोकिएको छ ।

कैलाली जिल्ला अदालत र उच्च अदालत दिपायलबाट टीकापुर हत्याकाण्डमा रेशम चौधरी दोषी ठहर भएका थिए । उनको पुनरवलोकन निवेदनमा सर्वोच्चले जेठ २ गते दोषी नै ठहर गरेको थियो । सर्वोच्चको फैसलाको पूर्णपाठ सार्वजनिक नहुँदै सरकारले चौधरीलाई कैद माफी दिएको थियो । उनी जेठ १६ गते जेलमुक्त भएका थिए ।

त्यसपछि हरिनाथ र वीरबहादुरको कैद माफीविरुद्ध शारदा कडायत र मन्थरादेवी विष्टले कात्तिक २१ गते रिट दायर गरेका थिए ।