काठमाडौं । दक्षिण अफ्रिकाले भारतमा जारी आईसीसी एकदिवसीय विश्वकपमा अफगानिस्तानमाथि पाँच विकेटको जित निकालेको छ । यो हारसँगै अफगानिस्तानको सेमिफाइनल पुग्ने सम्भावना समाप्त भएको छ ।

शुक्रबार अहमदाबादस्थित नरेन्द्र मोदी क्रिकेट रंगशालामा अफगानिस्तानले प्रस्तुत गरेको २४५ रनको लक्ष्य दक्षिण अफ्रिकाले ४७.३ ओभरमा पाँच विकेट गुमाएर भेटायो ।

दक्षिण अफ्रिकाको जितमा रासी भान डेर डुसेनले अविजित ७६ रन बनाए । यसैगरी क्विन्टन डी ककले ४१, एन्डिले फेहलुक्वायोले अविजित ३९, एडेन मार्करमले २५, डेविड मिलरले २४ र कप्तान टेम्बा बवुमाले २३ रन बनाए 

अफगानिस्तानका लागि मोहम्मद नाबी र राशिद खानले समान दुई विकेट लिए । यस्तै, मुजिब उर रहमानले एक विकेट लिए ।

त्यसअघि टस जितेर ब्याटिङ रोजेको अफगानिस्तानले निर्धारित ५० ओभरमा सबै विकेट गुमाएर २४५ रनको योगफल तयार पारेको थियो ।

अफगानिस्तानका अज्मतुल्लाह ओमरजाइले अविजित ९७ रन बनाएका थिए । यसैगरी रहमत शाह र नुर अहमदले समान २६ रन थपे । रहमानुल्लाह गुर्बजले २५, इब्राहिम जाद्रनले १५, राशिद खानले १४ र इक्रम अलिखिलले १२ रन बनाए ।

दक्षिण अफ्रिकाका जेराल्ड कोएट्जीले चार विकेट लिए । लुङ्गी एनगिडी र केशव महाराजले समान दुई विकेट लिदा एन्डिले फेहलुक्वायोले एक विकेट लिए ।

जितसँगै नौ खेलमा १४ अंक जोडेको दक्षिण अफ्रिका दोस्रो स्थानमा छ । प्रतियोगितामा पाँचौँ हार बेहोरेको अफगानिस्तानले भने आठ अंकसहित छैटौँ स्थानमा रहँदै यो संस्करणको अन्त्य गरेको छ ।