काठमाडौं । भारतमा जारी आईसीसी एकदिवसीय विश्वकपमा लिग चरण सकिन अन्तिम पाँच खेल बाँकी छन् । अर्थात्, अब सेमिफाइनल समीकरण पूरा हुन सबै टिमले एक/एक खेल खेल्नेछन् ।

गएको अक्टोबर ५ देखि सुरु भएको प्रतियोगितामा घरेलु टिम भारत, दक्षिण अफ्रिका र अस्ट्रेलियाले अन्तिम चारको यात्रा निश्चित गरिसके । बाँकी एक स्थानका निम्ति तीन टिम दौडमा छन् ।

१० टिम सहभागी प्रतियोगितामा बाँकी चार टिम लिग चरणबाटै बाहिरिने निश्चित भइसकेको छ । अंकतालिकाको शीर्ष स्थानमा आसिन भारत अपराजित छ । आठ खेलबाट १६ अंक जोडेको भारत अन्तिम खेलमा हारे पनि शीर्ष स्थानमा फरक पर्दैन । दोस्रो र तेस्रोमा रहेका दक्षिण अफ्रिका र अस्ट्रेलिया अन्तिम खेलमा पराजित भए ती स्थानको समीकरणमा फरक पर्छ । अर्थात्, अन्तिम खेलमा हार्ने टिम तेस्रो र विजयी हुने दोस्रो स्थानमा रहँदै सेमिफाइनलमा प्रवेश गर्नेछन् ।

न्युजिल्यान्ड, पाकिस्तान र अफगानिस्तानमध्ये कुन टिमको सम्भावना बलियो ?
सेमिफाइनलमा प्रवेश गर्ने अन्तिम एक टिम बन्न साविक उपविजेता न्युजिल्यान्ड, पाकिस्तान र अफगानिस्तान दौडमा छन् । न्युजिल्यान्ड चौथो, पाकिस्तान पाँचौँ र अफगानिस्तान छैटौँ स्थानमा छन् । तीनै टिमले आठ खेलबाट समान आठ अंक जोडेका छन् ।

सेमिफाइनल सम्भावना कायम राख्न अन्तिम खेलमा तीनै टिमलाई जितको विकल्प छैन । लिग चरणको अन्तिम खेलमा न्युजिल्यान्डले श्रीलंका, पाकिस्तानले इंग्ल्यान्ड र अफगानिस्तानले दक्षिण अफ्रिकासँग खेल्नछन् ।

न्युजिल्यान्डले बिहीबार, अफगानिस्तानले शुक्रबार र पाकिस्तानले शनिबार आफ्नो अन्तिम खेल खेल्दै छन् । अन्तिम खेलमा तीनै टिमले जित वा हारको नतिजा सामना गरे नेट रनरेटमा अघि रहने अन्तिम चारमा प्रवेश गर्नेछ ।

यस्तै, दुईले हार व्यहोर्दा विजयी हुने एक टिम सेमिफाइनलमा प्रवेश गर्नेछ । र, एक टिमले हार्दा दुई विजयी भए नेट रनरेटमा अघि रहनेले अन्तिम चारको यता तय गर्नेछ ।

सेमिफाइनल समीकरण
अन्तिम चारमा प्रवेश गर्नेमध्ये शीर्ष स्थानको टिमले चौथोसँग खेल्नेछ । दोस्रो स्थानको टिमले तेस्रोसँग प्रतिस्पर्धा गर्नेछ । यसानुसार शीर्ष स्थानको भारतले न्युजिल्यान्ड, पाकिस्तान र अफगानिस्तानमध्ये एक टिमसँग फाइनल प्रवेशका निम्ति खेल्नेछ । दोस्रो र तेस्रो स्थानका दक्षिण अफ्रिका र अस्ट्रेलियाबीच फाइनल प्रवेशका निम्ति प्रतिस्पर्धा हुनेछ ।

प्रतियोगिताको पहिलो सेमिफाइनल खेल यही नोभेम्बर १५ र दोस्रो नोभेम्बर १६ मा हुनेछ । फाइनल खेल नोभेम्बर १९ मा हुनेछ ।