काठमाडौं । पाकिस्तान क्रिकेट टिमका कप्तान बाबर आजम अढाइ वर्षपछि आईसीसी एकदिवसीय ब्याटिङ वरीयताको शीर्ष स्थानबाट खस्किएका छन् ।

आईसीसीले बुधबार अद्यावधिक गरेको नयाँ वरीयताअनुसार एकदिवसीय ब्याटिङतर्फ आजमलाई उछिन्दै भारतका यूवा ब्याटर सुभमन गिल शीर्ष स्थानमा उक्लिएका छन् । यसअघि आजम सन् २०२१ अप्रिल १४ यता एकदिवसीय ब्याटिङ वरीयताको शीर्ष स्थानमा थिए । त्यसबेला आजमले भारतका विराट कोहलीलाई पछि पार्दै शीर्ष वरीयतामा उक्लिएका थिए ।

बुधबारको नयाँ वरीयताअनुसार शीर्ष स्थानका गिलको ८३० अंक छ । दोस्रो स्थानमा झरेका आजमको ८२४ अंक छ । वरीयताको तेस्रो स्थानमा क्विन्टन डी कक, चौथोमा विराट कोहली र पाँचौँमा डेबिड वार्नर छन् ।

एकदिवसीय ब्याटिङ वरीयतामा नेपालका तीन ब्याटर अटाएका छन् । नेपाली टिमका ओपनर आसिफ शेख वरीयताको ७२औँ स्थानमा छन् । यस्तै, ८३औँ स्थानमा कप्तान रोहितकुमार पौडेल र कुशल भुर्तेल ९८औँ स्थानमा छन् ।