त्रिवेणी (रुकुम पश्चिम) । रुकुम पश्चिमको आठबिसकोट नगरपालिकाका भूकम्पपीडित परिवारले राहत सामग्री पाएका छन् । नगरपालिकाले आज भूकम्प प्रभावित क्षेत्रको विभिन्न ठाउँमा राहत सामग्री वितरण गरेको हो ।

मृत्यु भएका २०  घरपरिवार र अन्य पूर्णरूपमा क्षति भएका  ५० घरधुरीलाई नगरपालिकाले खाद्यान्न सामग्रीसँगै बस्नको लागि टेन्ट, त्रिपाल वितरण गरेको आठबिसकोट नगरपालिका जिन्सी शाखा प्रमुख टेकबहादुर चन्दले जानकारी दिए ।

उनका अनुसार मृतक प्रत्येक घरपरिवारलाई दुई बोरा चामल, पाँच किलो दाल, पाँच लिटर तेल, चाउचाउ  बस्नको लागि टेन्ट उपलब्ध गराएको हो । अन्य पूर्णरूपमा घर क्षति भएका ५० घर परिवालाई दाल, चामल, नुन, तेल र त्रिपाल वितरण गरिएको आठबिसकोट नगरपालिकाका निमित्त प्रमुख प्रशासकीय अधिकृत मनिराज शाहाले जानकारी दिए । 

नगरपालिकाको प्रभावित क्षेत्रमा पुगेर आज ७० बोरा चामल, दुई क्विन्टल दाल, नुन, तेललगायत विभिन्न खाद्यान्न सामग्री वितरण गरेको जनाएको छ । नगरपालिकाको ९, १० र १२ नम्बर वडाका केही ठाउँमा पीडितलाई राहत वितरण गर्न  बाँकी रहेको छ । 

आज नगरपालिकाको ११, १३ र १४ नम्बर वडाका भूकम्पपीडितलाई राहत सामग्री वितरण गरिएको निमित्त प्रमुख प्रशासकीय अधिकृत शाहले जानकारी दिए । बाँकी रहेको क्षेत्रमा भोलि राहत वितरण गरिने नगरपालिकाले जनाएको छ । नगरपालिकामा विभिन्न सङ्घ संस्थाबाट खाद्यान्न तथा राहत सामग्री आउने क्रम जारी छ  ।

जाजरकोटको रामीडाँडा केन्द्रविन्दु बनाएर शुक्रबार राति ६.४ रेक्टर स्केलको भूकम्प गएको थियो । सोही भूकम्पमा परेर रुकुम पश्चिम र जाजरकोट जिल्लामा ठूलो मानवीय क्षतिसँगै भौतिक क्षति भएको  छ । रुकुम पश्चिममा भौतिक संरचनामा पुर्‍याएको क्षतिको विवरण भने अझै आइसकेको छैन । रासस