काठमाडौं । प्राविधिक शिक्षा तथा व्यावसायिक तालिम परिषद् (सीटीईभीटी) दुई महिनादेखि सदस्यसचिवविहीन छ । सरकारले सदस्यसचिव नियुक्तिमा ढिलाइ गर्दा काम–कारबाही प्रभावित भएको छ ।

नयाँ सदस्यसचिव नियुक्त गर्न अघि बढाइएको प्रक्रिया समेत सरकारकै तर्फबाट स्थगित गरिएको छ । शिक्षा, विज्ञान तथा प्रविधि मन्त्रालयले नयाँ सदस्यसचिव सिफारिसका निम्ति यही कात्तिक १७ र १८ गते निर्धारित अन्तर्वार्ता र प्रस्तुतीकरण तालिका स्थगित गरेको छ । सिफारिस समितिका अध्यक्ष र सदस्यहरू नीतिगत कार्यमा व्यस्त रहेको भन्दै मन्त्रालयले शनिबार र आइतबारलाई तय गरेको तालिका अर्को सूचना जारी नहुन्जेलका निम्ति स्थगित गरेको हो ।

मन्त्रालयले सदस्यसचिव पदमा आवेदन माग गर्दै गएको भदौ २९ गते सिफारिस समिति गठन गरेको थियो । समितिले आवेदकमध्येबाट कार्ययोजना प्रस्तुतीकरण र अन्तर्वार्ताका निम्ति कात्तिक १२ गते आठजनाको नाम ‘सर्ट लिस्टेड’ गरेको थियो ।

दुई महिनादेखि रिक्त सदस्यसचिवको जिम्मेवारी निमित्तका रूपमा महेश भट्टराईले निभाइरहेका छन् । भट्टराई सीटीईभीटीको प्राविधिक प्रशिक्षण प्रतिष्ठानका कार्यकारी निर्देशक हुन् ।

दुई वर्षमै जिम्मेवारीमुक्त काफ्ले
सीटीईभीटीको सदस्यसचिव यसअघि जीवनारायण काफ्ले थिए । ५८ वर्ष पूरा भएसँगै उनी गएको साउन ४ गते निजामती सेवाबाट ‘रिटायर्ड’ भए । ०७८ असार ७ गते सदस्यसचिव नियुक्त भएका उनको कार्यकाल करिब दुई वर्ष रह्यो ।

प्राविधिक शिक्षा तथा व्यावसायिक तालिम परिषद् नियमावली, २०५१ मा सदस्यसचिव पदको कार्यकाल चार वर्ष हुने व्यवस्था छ । सोही व्यवस्थाअनुसार काफ्ले आफ्नो कार्यकाल नियमित गरिपाऊँ भन्दै सर्वोच्च अदालत समेत पुगेका थिए ।

सर्वोच्चले मुद्दा अन्तिम किनारा नलागेसम्म कामकाजबाट नहटाउन सोही वर्ष साउन १ गते अन्तरिम आदेश दिएको थियो । तर, सो आदेश खारेजीका निम्ति शिक्षा मन्त्रालयले ‘भ्याकेट’ निवेदन दियो । त्यसपछि सर्वोच्चले काफ्लेको विपक्षमा आदेश दिएको थियो । र, भदौ २१ गतेदेखि उनी जिम्मेवारीमुक्त भएका थिए ।

परिषद् ऐन, २०४५ को दफा २ अनुसार हाल परिषद्भित्रकै कर्मचारीबाट नयाँ सदस्यसचिव नियुक्ति प्रक्रिया अघि बढाइएको मन्त्रालयले जनाएको छ ।

सिफारिस समितिले पठाएका नाममध्येबाट मन्त्रिपरिषद्ले सदस्यसचिव नियुक्त गर्ने व्यवस्था छ ।