काठमाडौं । जाजरकोटमा शुक्रबार राति गएको भूकम्पका कारण ठूलो जनधनको क्षति भएको छ । शुक्रबार राति ११ बजेर ४७ मिनेटमा जाजरकोटको रामीडाँडा आसपास केन्द्रविन्दु भएर ६.४ म्याग्निच्युडको भूकम्प गएको थियो ।

त्यसपछि पनि निरन्तर भूकम्पको धक्का मापन गरिएको छ । शनिबार दिउँसोसम्म १७५ भन्दा धेरै परकम्प मापन भइसकेको राष्ट्रिय भूकम्प मापन तथा अनुसन्धान केन्द्रले जानकारी गराएको छ ।

• जाजरकोट भूकम्प : विज्ञ भन्छन्– सचेत गरायो, महाभूकम्पको जोखिम टरेको छैन

निरन्तरको धक्काले स्थानीयवासी त्रासमा छन् । घरहरू भत्किएका र चर्किएका छन् । शनिबार कतिपय स्थानीय सडकमै सुतेका देखिएको छ ।

जाजरकोटको भेरी नगरपालिका–३, थाप्लेका सर्वसाधारण भूकम्पको त्रासले सडकमा सुत्दै गरेको राससका पत्रकार हेमन्त केसीले खिचेको तस्बिरमा देखिन्छ ।

राससकै अर्का पत्रकार सुरेश आचार्यले खिचेको तस्बिरमा भूकम्पको डरले जाजरकोट सदरमुकाम खलंगा बजारमा सडकमै बसेका स्थानीय देखिन्छ ।

तस्बिर : सुरेश आचार्य/रासस ।

केसी र आचार्यका अनुसार बालबालिका र महिलासहितका स्थानीय भूकम्पको त्रासले सडकमै बसेका छन् ।

सो भूकम्पमा परी जाजरकोट र रुकुम पश्चिममा ठूलो जनधनको क्षति भएको छ ।