काठमाडौं । शुक्रबार राति जाजरकोटलाई केन्द्रविन्दु बनाएर गएको ६.४ म्याग्निच्युडको भूकम्पले गरेको जनधनको क्षतिप्रति अन्तर्राष्ट्रिय समुदायले दुःख व्यक्त गरेका छन् । उनीहरुले भूकम्पपीडितलाई सहयोग गर्ने प्रतिबद्धता समेत व्यक्त गरेका छन् । 

भारतका प्रधानमन्त्री नरेन्द्र मोदीले नेपालमा गएको भूकम्पबाट भएको जनधनको क्षतिले मर्माहत भएको जनाएका छन् । “नेपालमा गएको भूकम्पबाट भएको जनधनको क्षतिले निकै मर्माहत भएको छु । भारत नेपाली जनतासँग ऐक्यबद्धता जनाउँदै हरसम्भव सहयोगका लागि तयार रहेको छ,” भारतीय प्रधामन्त्री मोदीले सामाजिक सञ्जाल एक्समा लेखेका छन् ।
 
नेपालका लागि अमेरिकी राजदूत डीन आर थम्पसनले भूकम्पपीडितलाई सहयोग गर्न अमेरिका तयार रहेको बताएका छन् । राजदूत थम्पसनले सामाजिक सञ्जाल एक्समा लेखेका छन्, “नेपालको जाजरकोट र रुकुम (पश्चिम)मा गएको भूकम्पमा परी आफन्त गुमाएका परिवारजनमा गहिरो समवेदना प्रकट गर्दछु ।” 

नेपालका लागि चिनियाँ राजदूत चेन सङले पनि चीन यस दुःखद घडीमा नेपाली जनताको साथमा रहेको बताएका छन् । “यो दुःखद घडीमा हाम्रो साथ प्रभावितहरूसँग छ । हामी नेपाली जनता र सरकारलाई सहयोग गर्न तत्तपर छौं,” उनले भनेका छन् । 

दक्षिण एसिया हेर्ने विश्व बैंकका उपाध्यक्ष मार्टिन रेजरले नेपालमा शुक्रबार राति गएको भूकम्पले आफूलाई दुःखी बनाएको जनाएका छन् । उनले नेपाली जनतालाई सुरक्षित राख्ने प्रयासलाई जारी राख्ने बताएका छन् ।

नेपाल प्रहरीका अनुसार शुक्रबार राति गएको भूकम्पमा परी हालसम्म १३३ जनाको मृत्यु भएको छ । १४० जना घाइते भएका छन् ।